Президент Шавкат Мирзиёев Қирғизистон президенти Садир Жапаровнинг таклифига биноан 31 август — 1 сентябрь кунлари Шанхай ҳамкорлик ташкилотига аъзо давлатлар раҳбарлари кенгашининг навбатдаги йиғилишида иштирок этиш учун Бишкек шаҳрига боради.
Саммит кун тартибидан ШҲТ доирасидаги кўп томонлама ҳамкорликни ривожлантириш, ташкилот фаолиятини такомиллаштириш, шунингдек, халқаро ва минтақавий масалаларни муҳокама қилиш ўрин олган.
Йиғилиш якунида ШҲТнинг 25 йиллигига бағишланган Бишкек декларацияси ҳамда хавфсизлик, иқтисодиёт, транспорт, экология, сунъий интеллект ва маданий-гуманитар ҳамкорликка оид қатор ҳужжатларни қабул қилиш режалаштирилган.
Ташриф давомида Шавкат Мирзиёев хорижий делегациялар раҳбарлари билан икки томонлама учрашувлар ўтказади. Шунингдек, Ўзбекистон етакчиси VI Бутунжаҳон кўчманчилар ўйинларининг очилиш маросимида иштирок этади.
