Венесуэла ва АҚШ ўртасида нефть соҳасида тузилган икки томонлама келишув 25 йил давомида амал қилади. Бу ҳақда Венесуэла муваққат президенти Делси Родригес давлат телеканали орқали қилган мурожаатида маълум қилди.
Унинг сўзларига кўра, лойиҳа доирасида 17 та стратегик нефть конини ўзлаштириш режалаштирилган. Дастлаб кунига 1,5 млн баррел нефть қазиб олиниши кўзда тутилган. Кейинчалик яна 8 та нефть конини ўзлаштириш орқали ишлаб чиқариш ҳажмини ошириш режалаштирилмоқда.
Родригеснинг баҳолашича, нефть нархи баррелига 65 доллар бўлган тақдирда, лойиҳа Венесуэлага 209 млрд доллар миқдорида даромад келтириши мумкин. Шунингдек, ҳар бир сотилган баррел нефть учун 19 доллар тўғридан-тўғри Венесуэла давлат бюджетига йўналтирилади.
Муваққат президентнинг таъкидлашича, келишув натижасида Венесуэла ўзининг табиий ресурслари устидан суверенитет ва назоратни сақлаб қолади. Шу билан бирга, мамлакат санкциялар таъсирида зарар кўрган нефть саноатини модернизация қилиш учун зарур капитал, технология ва билимларга эга бўлади.
