Саккиз карра "Олтин тўп" соҳиби Лионель Месси Аргентина миллий терма жамоасидаги фаолиятини якунлаганини маълум қилди. Футболчи бу ҳақда ўзининг ижтимоий тармоқдаги саҳифаси орқали хабар берди.
"Жаҳон чемпионати финалидан бироз вақт ўтиб, ҳаммасини яхшилаб ўйлаб кўрганимдан сўнг, терма жамоадан кетаётганимни маълум қилмоқчиман. Бу қарор мен учун оғриқли бўлди ва ҳануз қалбимни яраламоқда. Аммо энди вақти келганини тушуняпман.
Ишонтириб айтаманки, мен ҳар доим бор кучимни бердим — нафақат сўнгги йилларда, барча совринларни қўлга киритганимизда, балки ундан олдин ҳам. Мен доимо шу либос учун курашдим ва сизларга қувонч улашиш, аргентиналик эканингиздан фахрланишингиз учун боримни бердим", — деб ёзди Месси.
39 ёшли футболчи Аргентина терма жамоасидаги дебютини 2005 йил август ойида ўтказган. Унинг «албиселеста» сафидаги сўнгги учрашуви 19 июль куни Испанияга қарши 2026 йилги Жаҳон чемпионати финали бўлган.
Месси терма жамоа билан Жаҳон чемпионати, Америка кубоги ва бошқа қатор совринларни қўлга киритган.
Аввалроқ аргентиналик футболчи АҚШнинг "Интер Майами" клуби сафида МЛС доирасида "Монреаль"га қарши учрашувда 4 та гол урган эди. Мазкур баҳсда "Интер Майами" 7:1 ҳисобида ғалаба қозонган.
Месси «Интер Майами»га ўтишидан олдин Испаниянинг "Барселона" ва Франциянинг "Пари Сен-Жермен" клубларида тўп тепган.
Футболчи фаолияти давомида 1164 та учрашувда майдонга тушиб, 927 та гол урган.
