Ўзбекистон Республикаси Президенти Шавкат Мирзиёевнинг Қирғиз Республикасига амалий ташрифи якунланди. Давлат раҳбари 1 сентябрь куни Бишкек шаҳрида ўтказилган бир қатор муҳим тадбирларда иштирок этди.
Ташрифнинг асосий воқеаси Шанхай ҳамкорлик ташкилотига аъзо давлатлар раҳбарлари кенгашининг юбилей йиғилиши бўлди. Унда ташкилотнинг 25 йиллик фаолияти сарҳисоб қилиниб, келгусидаги ҳамкорликнинг устувор йўналишлари муҳокама қилинди.
Шавкат Мирзиёев йиғилишда саноат кооперациясини чуқурлаштириш, транспорт-транзит алоқаларини ривожлантириш, рақамли технологиялар ва сунъий интеллектни кенг жорий этиш, шунингдек, озиқ-овқат, сув ва энергетика хавфсизлигини таъминлаш бўйича қатор ташаббусларни илгари сурди.
Йиғилиш якунида Бишкек декларацияси ҳамда ШҲТ доирасида ҳамкорликни турли йўналишларда кенгайтиришга қаратилган қатор ҳужжатлар қабул қилинди.
Шунингдек, Ўзбекистон Президенти БМТнинг адолатли ва кўп қутбли дунё тартиботини шакллантиришдаги ролига бағишланган “ШҲТ плюс” форматидаги учрашувда нутқ сўзлади.
Давлат раҳбари БМТнинг марказий ва мувофиқлаштирувчи ролини сақлаб қолиш муҳимлигини таъкидлаб, “ШҲТ плюс”ни минтақалараро мулоқот майдони сифатида ривожлантиришни таклиф қилди.
Саммит доирасида Шавкат Мирзиёев Хитой Халқ Республикаси Раиси Си Цзиньпин, Россия Президенти Владимир Путин ва Покистон Бош вазири Шаҳбоз Шариф билан икки томонлама учрашувлар ўтказди.
Президент, шунингдек, БМТ Бош котиби Антониу Гутерриш ҳамда АҚШ Президентининг Жанубий ва Марказий Осиё бўйича махсус вакили Сержио Гор билан мулоқот қилди.
Бишкек шаҳрида Шавкат Мирзиёев рафиқаси Зироат Мирзиёева билан биргаликда VI Бутунжаҳон кўчманчилар ўйинларининг тантанали очилиш маросимида ҳам иштирок этди.
Ташриф дастуридаги тадбирлар якунлангач, Ўзбекистон Президенти ва рафиқасини “Манас” халқаро аэропортида Қирғиз Республикаси Вазирлар Маҳкамаси раиси — Президент Администрацияси раҳбари Адилбек Қасималиев ҳамда бошқа расмийлар кузатиб қўйди.
Шундан сўнг давлатимиз раҳбари Тошкент шаҳрига қайтиб келди.
