АҚШ президенти Дональд Трампнинг махсус вакили Стив Уиткофф ва унинг куёви Жаред Кушнер Россия ва Украинага ташриф буюриб, урушни тугатиш бўйича музокаралар ўтказади. Улар 5 сентябрь куни Москвага бориб, Россия президенти Владимир Путин билан учрашиши, кейин Киевга йўл олиши кутилмоқда. Бу ҳақда BBC нашри хабар қилди.
Украина президенти Владимир Зеленский 6 сентябрь куни Уиткофф ва Кушнер билан учрашишини тасдиқлади. Трампнинг сўзларига кўра, америкалик вакиллар "урушни тугатиш бўйича таклиф" олиб боради.
Стив Уиткофф ва Жаред Кушнер Трамп маъмуриятининг Россия ва Украина ўртасида тинчлик келишувига эришиш бўйича музокараларида асосий ролни бажармоқда.
Кремль матбуот котиби Дмитрий Песков ташрифни расман тасдиқламади. У Россия ва АҚШ ўртасидаги алоқалар давом этаётганини айтди.
Владимир Путин эса аввалроқ Москва ва Киев аввало ўзаро келишиб олиши кераклигини билдирган. Шу билан бирга, Россия Украинадан ҳудудий имтиёзлар талаб қилишда давом этмоқда.
Россия 2022 йил февраль ойида Украинага кенг кўламли босқинни бошлаган. Ҳозирда Россия Украина ҳудудининг қарийб 20 фоизини назорат қилмоқда.
