Хитойнинг Шэньси провинциясида кучли ёмғир ва сел оқибатида автомобиль кўприги қулаб тушди. Ҳодиса натижасида камида 11 киши ҳалок бўлган, 30 дан ортиқ фуқаро бедарак йўқолган. Бу ҳақда AlJazeera хабар берди.
Маълум қилинишича, Шанло шаҳридаги дарё устидан ўтган кўприк жума куни соат 20:40 атрофида кучли ёмғир ва тўсатдан келган сел туфайли дарёга қулаган. Кўприк қулаш вақтида унда 20 га яқин автомобиль бўлган.
Қутқарувчилар ҳозирга қадар сувдан бешта автомобилни чиқарган ва улар ичида 11 кишининг жасади аниқланган. 30 дан ортиқ одамнинг тақдири ҳозирча номаълум.
Хитой раҳбари Си Цзиньпин бедарак йўқолганларни қидириш ва қутқариш ишларини кучайтириш бўйича топшириқ берган.
Сўнгги кунларда Хитойнинг шимолий ва марказий ҳудудларида кучли ёғингарчиликлар кузатилиб, сув тошқинлари ва кўчкиларга сабаб бўлмоқда. Шэньси провинциясининг Баоцзи шаҳрида ҳам ёмғирлар оқибатида камида беш киши ҳалок бўлган, саккиз киши бедарак йўқолган.
