Миграция агентлиги E-9 визаси асосида Корея Республикасига вақтинчалик ишлаш учун бораётган фуқаролар билан тузиладиган уч томонлама шартноманинг айрим бандларини қайта кўриб чиқди.
Янги тартибга кўра, фуқаролар иш жойини ўзгартиришдан олдин Миграция агентлигининг Кореядаги ваколатхонасидан алоҳида розилик олиши шарт эмас. Шунингдек, ушбу талабга риоя этилмагани учун жарима қўллашни назарда тутувчи бандлар шартномадан чиқариб ташланди.
Агентлик маълум қилишича, ўзгартишлар Кореядаги иш берувчилар ва нодавлат ташкилотлари билан ўтказилган музокаралар ҳамда фуқаролар мурожаатлари таҳлили асосида киритилган.
Эндиликда фуқаролар амалдаги қонунчиликка мувофиқ иш берувчи билан меҳнат шартномасини бекор қилиб, янги иш берувчи билан меҳнат муносабатларига киришиши мумкин.
Шу билан бирга, Кореяда ноқонуний мақомда қолганлик учун жарима қўллаш тўғрисидаги банд сақлаб қолинган.
E-9 визаси билан ишлаётган фуқаро меҳнат шартномасини бекор қилганидан кейин 1 ой ичида иш изловчи сифатида рўйхатдан ўтиши ва 90 кун ичида янги ишга жойлашиши керак. Белгиланган муддатларда бу талаблар бажарилмаса, фуқаро Кореядан чиқиб кетиши лозим.
Акс ҳолда, у ноқонуний мақомга ўтиши ва Корея қонунчилигига мувофиқ жарима, депортация ҳамда мамлакатга қайта кириш тақиқига дуч келиши мумкин.
Миграция агентлиги фуқароларни иш жойини ўзгартиришда Корея қонунчилигида белгиланган тартиб ва муддатларга риоя қилишга чақирди.
