Португалия терма жамоаси ҳужумчиси Криштиану Роналдунинг онаси Долорес Авейру ўғлига мамлакатда кўрсатилаётган муносабатдан хафа эканини билдирди. Унинг фикрича, Роналду Португалия футболи учун кўп иш қилган бўлса-да, муносиб қадрланмаган. Бу ҳақда Авейру “TV7 Dias” нашрига берган интервьюсида сўз очди.
“Мен хафа бўлдим, бу табиий ҳолат. Бу мен учун шок бўлди. Ўғлим терма жамоани олд эшикдан чиқиб тарк этиши мумкин эди, аммо у орқа эшикдан чиқиб кетди. Лекин бу ҳам майли, ҳаммасини Худо ҳал қилади. Мен бироз йиғладим. У билан биринчи марта телефонда гаплашганимизда, унга тинчланишни айтдим. Аммо у ўз қарорини қабул қилди. Шундай бўлса-да, у Португалия учун жуда кўп иш қилди. У доимо мамлакат қаҳрамони бўлган, лекин муносиб даражада қадрланмаган”, дейди Долорес Авейру.
Аввалроқ Криштиану Роналду Португалия терма жамоаси йиғинини муддатидан олдин тарк этгани ҳақида хабар берилган эди. Футболчининг айтишича, бунга терма жамоа бош мураббийи Роберто Мартинеснинг унга берган ваъдасини икки марта бузгани сабаб бўлган.
Роналду Миллатлар лигаси доирасида Уэльсга қарши учрашувда (1:0) майдонга тушган. Бироқ Норвегияга қарши баҳсда (2:1) захирада қолдирилган.
Футболчининг таъкидлашича, дастлаб унинг Норвегияга қарши ўйинда майдонга тушиши режалаштирилмаган. Аммо мураббий ундан учрашувнинг 30-дақиқасида майдонга тушишга тайёр туришни сўраган ва исиниш учун юборган. Шунга қарамай, Роналду ўйин давомида захирада қолган. Унинг сўзларига кўра, мураббий бу ҳолатни учрашувдан кейинги матбуот анжуманида изоҳлаши керак эди, аммо бундай қилмаган.
Кейинроқ Роналду терма жамоани тарк этиш нияти йўқлигини билдирган. Шунингдек, Португалия футбол федерацияси унга нисбатан интизомий чора қўллаган тақдирда ҳам терма жамоага чақирилиши мумкинлигини айтган.
Португалия футбол федерациясининг интизомий қоидаларига кўра, терма жамоани рухсатсиз тарк этиш бир ойдан олти ойгача ўйинлардан четлатиш ва 500 евродан 1 000 еврогача жаримага сабаб бўлиши мумкин. Роналду ўзига нисбатан белгиланадиган жазони қабул қилишга тайёрлигини билдирган.
Маълумот учун, 41 ёшли Криштиану Роналду беш карра Чемпионлар лигаси ғолиби, Европа чемпиони ва икки карра Миллатлар лигаси ғолибидир. У терма жамоалар, Европа чемпионатлари, Чемпионлар лигаси ва клублар ўртасидаги жаҳон чемпионатидаги голлари бўйича қатор рекордларга эга.
Футболчи 2022 йил декабрь ойидан буён Саудия Арабистонининг “Ал-Наср” клубида тўп сурмоқда. У фаолияти давомида жами 979 та гол урган. Шундан 146 таси Португалия терма жамоаси, 833 таси эса клублар сафида киритилган.
