Кеча АҚШнинг Калифорния штатидаги Фресно шаҳри яқинида кичик самолёт қулаши оқибатида икки нафар бола ҳалок бўлди. Яна икки нафар катта ёшли киши оғир аҳволда шифохонага етказилган. Бу ҳақда New York Post хабар берди.
Маълум қилинишича, тўрт киши бўлган самолёт маҳаллий вақт билан тахминан соат 14:00 да Сан-Хоакин дарёси яқинида қулаб тушган. Ҳодиса жойига полиция, ўт ўчирувчилар ва қутқарув хизматлари етиб борган.
Қулаган самолёт қолдиқлари дарё яқинидаги тепаликдан топилган. Ҳодиса оқибатида яқин ҳудудда ёнғин ҳам юзага келган.
Ҳозирча ҳалокатга нима сабаб бўлгани маълум эмас. Жабрланганларнинг шахси ва аниқ ёши ҳам расман очиқланмаган.
Терговга АҚШ Федерал авиация бошқармаси (FAA) ва Миллий транспорт хавфсизлиги кенгаши (NTSB) жалб қилинган. Ҳодиса жойи атрофида хавфсизлик чоралари кучайтирилган.
Самолётнинг қулаши яқин атрофдаги айрим хонадонларда электр таъминоти узилишига ҳам сабаб бўлган. Кейинчалик электр таъминоти тикланган.
