Канада Марказий банки янги 20 долларлик банкнота дизайнини тақдим қилди. У 2027 йил февраль ойидан муомалага киритилиши режалаштирилган. Бу ҳақда Bloomberg маълум қилди.
Янги банкнотанинг асосий янгилиги — унинг вертикал кўринишда ишлангани. Шунингдек, у Канада тарихида подшоҳ Карл III тасвири туширилган биринчи банкнота бўлади.
Янги купюрада марҳум қиролича Елизавета II ўрнига Карл III портрети жойлаштирилган. Банкнотанинг орқа томонида эса Франциядаги Вими тизмасида ҳалок бўлган канадалик ҳарбийлар хотирасига бағишланган Канаданинг миллий Вими мемориали акс эттирилган.
Банкнота замонавий ҳимоя технологиялари билан жиҳозланган. Унда 3D эффектлар, ҳаракатланаётгандек кўринадиган тасвирлар ва бўртма ёзувлар қўлланилган.
Янги 20 долларлик банкнотада Канададаги 13 провинция ва ҳудуднинг гул рамзлари ҳам акс эттирилган.
