Нью-Йоркда 11 сентябрь терактларининг 25 йиллиги арафасида қурбонлар хотирасига бағишланган дронлар шоуи ўтказилди. Унда 2 977 та дрон ёрдамида “Эгизак миноралар” қиёфаси осмонда қайта гавдалантирилди.
“2 977 Lights Over New York Harbor” деб номланган инсталляциядаги ҳар бир дрон 2001 йил 11 сентябрда ҳалок бўлган бир инсонни рамзий ифодалаган. Дронлар бирлашиб, Жаҳон савдо марказининг 2001 йилгача бўлган “Эгизак миноралари”ни тўлиқ ҳажмда тасвирлаган.
Тадбирда 11 сентябрь терактларидан омон қолганлар, қурбонларнинг яқинлари ва Нью-Йорк ўт ўчирувчилари иштирок этган. Инсталляция Нью-Йоркдаги анъанавий “Tribute in Light” хотира тадбири билан бир вақтда намойиш этилган.
2001 йил 11 сентябрда “Ал-Қоида”га алоқадор 19 нафар террорчи тўртта йўловчи самолётини олиб қочган. Улардан иккитаси Жаҳон савдо марказининг “Эгизак миноралари”га, яна бири Пентагон биносига урилган. Тўртинчи самолёт эса йўловчиларнинг қаршилигидан сўнг Пенсилвания штатидаги далага қулаган. Натижада 2 977 нафар киши ҳалок бўлган.
