Филиппинда паромда содир бўлган ёнғин оқибатида ҳалок бўлганлар сони 76 нафарга етди. Яна 13 киши бедарак йўқолган. Бу ҳақда мамлакат Қирғоқ қўриқлаш хизмати маълум қилди.
Қидирув-қутқарув ишлари давомида M/V June Aster паромидан яна 41 нафарнинг куйган жасади топилган. Махсус хизматлар ҳалок бўлганларнинг шахсини аниқлаш ишларини олиб бормоқда.
Маълум бўлишича, 9 сентябрь куни Маниладан йўлга чиққан паромда 132 нафар йўловчи ва экипаж аъзоси бўлган. Кема Палаван вилоятидаги Корона шаҳрига яқинлашганида, соҳилдан тахминан 2,2 километр масофада ёнғин чиққан.
Ҳодиса вақтида 43 киши сувдан қутқарилган. Тирик қолганларнинг айтишича, ёнғиндан олдин кетма-кет бир нечта портлаш овозлари эшитилган. Шундан сўнг олов йўловчилар жойлашган қисмларга тез тарқалган.
Филиппин Қирғоқ қўриқлаш хизмати вакили Ноэми Кайябябнинг билдиришича, тирик қолганлар кўрсатмаларига кўра, кучли шамол оловнинг тез тарқалишига сабаб бўлган бўлиши мумкин. Айрим йўловчилар ёнғинни кўриб, қутқарув жилетларини олишга улгурмасдан сувга сакраган.
Ҳозирда ҳалок бўлганларни аниқлаш учун суд-тиббий экспертлар ва полиция ходимлари иш олиб бормоқда. Шахслар шахсий буюмлар ва ДНК таҳлиллари орқали аниқланмоқда.
Шунингдек, паромдаги хавфсизлик чоралари ҳамда капитаннинг фалокатнинг дастлабки дақиқаларидаги ҳаракатлари текширилмоқда.
Паром оператори — Atienza Interisland Ferries компанияси тергов жараёнида "тўлиқ шаффофлик"ни таъминлашини билдириб, жабрланганлар оилаларига жойлашиш, транспорт ва тиббий ёрдам масалаларида кўмаклашишини маълум қилди.
