Украина президенти Володимир Зеленский Россия раҳбари Владимир Путин 60 кунлик тўлиқ сулҳга рози бўлса, мамлакатда президентлик сайловларини ўтказишга тайёрлигини билдирди. Бу ҳақда у ABC News телеканали журналисти Жонатан Карлга берган интервьюсида маълум қилди.
Зеленский АҚШ президенти Дональд Трампнинг Украинага янги етакчи кераклиги ҳақидаги баёнотига муносабат билдириб, мамлакат раҳбарини сайлаш украин халқининг ўзи ҳал қиладиган масала эканини таъкидлади.
"Президент Трамп Украинада янги сайловлар ўтказишимиз кераклигини айтди. Унинг фикрига ҳурмат билан қарайман, аммо мамлакат раҳбарини сайлаш жамиятимиз ва халқимизнинг ишидир. Биз уруш ҳолатидамиз ва бундай шароитда сайлов ўтказиш ҳақиқатан ҳам жуда қийин", — деди Зеленский.
Унинг таъкидлашича, муаммо фақат Украина қонунчилигида эмас. Ҳозирги шароитда сайловчиларнинг хавфсиз овоз беришини таъминлайдиган зарур инфратузилма ҳам мавжуд эмас.
"Агар президент Трамп ҳақиқатан ҳам сайловлар орқали ўзгаришлар бўлишини истаса, бу ҳақда унинг жамоасига ҳам айтганман. Улар Путинга мурожаат қилиб, бизга нафас ростлаш учун икки ой, яъни 60 кун беришини сўрасин. Агар ўт очиш 60 кун давомида тўлиқ тўхтатилса, биз сайловларни ташкил этамиз. Албатта, украин халқининг ҳар қандай танловини қабул қилишга тайёрмиз", — деди Украина раҳбари.
Эслатиб ўтамиз, бир кун олдин Дональд Трамп Украинада келишувларга эриша оладиган янги етакчи сайланиши кераклигини айтган эди.
"Мен уларга келишувлар туза оладиган янги етакчи топишни таклиф қиламан. Зеленский кўплаб битимлар тузиши мумкин эди, аммо негадир буни ҳеч қачон қилмади", — деган Трамп.
Шунингдек, АҚШ президенти Зеленскийни Россиянинг нефтни қайта ишлаш заводларига берилаётган зарбалар учун танқид қилган. Трампнинг айтишича, Вашингтон Украина раҳбарига Россияга қарши исталган чорани кўриши мумкинлигини, бироқ нефтни қайта ишлаш заводларига ҳужум қилмаслиги кераклигини билдирган. У бундай зарбалар глобал муаммоларни келтириб чиқариши мумкинлигини таъкидлаган.
Кейинчалик Зеленский Россия Украина энергетика инфратузилмасига ҳужумларни тўхтатса, Украина ҳам Россиядаги нефтни қайта ишлаш заводларига зарба беришни бас қилишини маълум қилган.
