Қорақалпоғистоннинг Кегейли туманида Оролбўйи иқлими ва шўр тупроқ шароитига мос саноатлашган интенсив боғдорчилик йўлга қўйилди. Лойиҳа доирасида келгусида ҳудуддаги интенсив боғлар майдонини 10 минг гектарга етказиш режалаштирилмоқда.
Президент Шавкат Мирзиёев 18 сентябрь куни Кегейли туманидаги “ADM Agro” корхонасининг саноатлашган интенсив боғини кўздан кечирди.
Маълум қилинишича, Жиззах вилоятида автомобиль ишлаб чиқариш билан шуғулланувчи “ADM Group” компанияси фаолиятини диверсификация қилиб, Оролбўйида интенсив боғдорчилик йўналишини ҳам йўлга қўйган.
Қиймати 55 миллиард сўм бўлган лойиҳа доирасида умумий майдони 330 гектар бўлган боғ барпо этилган. Ҳозиргача 69 гектар майдонга АҚШ селекциясига мансуб 250 минг туп қора олхўри кўчати экилган.
Қайд этилишича, мазкур нав шўр тупроққа чидамли бўлиб, кўчатлар экилганидан кейин икки йилда ҳосилга киради. Бир туп дарахтдан 50–60 килограммгача ҳосил олиш мумкин. Меванинг йириклиги ва данагининг осон ажралиши уни қайта ишлаш учун қулай ҳисобланади.
Ердан самарали фойдаланиш мақсадида дарахтлар орасига помидор ҳам экилган. Бир гектар майдондан ўртача 40–45 тонна ҳосил олиш имкони бор.
Боғда сув тежовчи замонавий технологиялар ҳам жорий этилган. Хусусан, ёпиқ дренаж ва томчилатиб суғориш тизимлари ўрнатилган. Оддий суғоришда бир гектар майдонга 12 минг литр сув сарфланса, янги тизим орқали бу кўрсаткич 5 минг литрга туширилган. Натижада сув сарфи 60 фоизгача тежалмоқда.
Сув ва минерал ўғитлар тўғридан-тўғри ўсимлик илдизига етказиб берилади. Тизимнинг автоматлаштирилгани эса катта майдонларни кам сонли ишчи кучи билан бошқариш имконини бермоқда.
Лойиҳа доирасида етиштирилган меваларни шу ернинг ўзида қуритиш ва қайта ишлаш ускуналари ҳам ўрнатилган. Бу тайёр маҳсулот қийматини оширишга хизмат қилмоқда.
Тайёр маҳсулотларни экспорт қилиш бўйича Хитой, Жанубий Корея ва Россия билан шартномалар тузилгани маълум қилинди.
Таъкидланишича, Кегейли туманидаги тажриба келгусида Қорақалпоғистоннинг бошқа ҳудудларида ҳам жорий этилади. Интенсив боғлар майдонини 10 минг гектарга етказиш ва 40 мингта доимий ҳамда мавсумий иш ўрни яратиш режалаштирилган.
Президент Шавкат Мирзиёев боғда фермерлар билан ҳам мулоқот қилди.
