АҚШ Беларусьдан калийли ўғит харид қилиш бўйича “йирик келишув” устида ишламоқда. Бу ҳақда АҚШ Президенти Дональд Трамп 21 сентябрь куни Truth Social ижтимоий тармоғида маълум қилди.
“АҚШ Беларусьдан калий сотиб олиш бўйича йирик келишув устида ишламоқда. Нархи ҳозир Канадага тўлаётганимиздан анча паст бўлади. Бу фермерларимиз ва чорвадорларимиз учун жуда яхши янгилик”, деб ёзди Трамп.
Бироқ Трампнинг баёнотидан бир неча соат олдин Беларусь Президенти Александр Лукашенко мамлакат Ғарб бозорларига қўшимча ҳажмда калий етказиб бера олмаслигини айтган.
“Биз экспортни Шарққа қайта йўналтиришга муваффақ бўлдик. Агар бошқа бозорларга, жумладан Ғарб бозорларига етказиб беришни хоҳласак ҳам, бизда бундай ҳажм йўқ — ҳаммаси шартнома асосида банд қилинган”, деди Лукашенко.
Беларусь Канада ва Россия билан бир қаторда дунёдаги йирик калийли ўғит ишлаб чиқарувчиларидан бири ҳисобланади. АҚШ эса калийли ўғитнинг асосий қисмини импорт қилади. 2021–2024 йилларда мамлакат импорт қилган калийнинг қарийб 80 фоизи Канада ҳисобига тўғри келган.
Беларусь калий саноатига нисбатан АҚШ санкциялари аввал жорий этилган бўлса, Дональд Трампнинг иккинчи президентлик муддати бошланганидан кейин Вашингтон Минск билан муносабатларни юмшатиш йўлидан борди ва Беларусь калийи экспортига нисбатан айрим санкциялар бекор қилинди. Европа Иттифоқи эса Беларусь калийига нисбатан чекловларни сақлаб қолган.
Трампнинг таклифи ҳозирча аниқ ҳажм, етказиб бериш муддати ёки шартлари белгиланган тайёр келишув эмас. Лукашенконинг баёноти эса Беларусьнинг мавжуд калий захиралари бошқа бозорлар учун шартномалар билан банд эканини кўрсатмоқда.
