Навоий шаҳридаги хусусий боғчалардан бирида 1 ёшдан 3 ёшгача бўлган болаларни калтаклаб келган тарбиячига суд ҳукми ўқилди. У 3 йил 3 ой муддатга озодликдан маҳрум қилинди. Бу ҳақда Darakchi.uz суд ҳужжатлари билан танишди.
Суд ҳужжатларига кўра, 2003 йилда туғилган Н.Е. 2025 йил декабридан 2026 йил апрелига қадар хусусий боғчада 1 ёшдан 3 ёшгача бўлган болалар гуруҳида тарбиячи бўлиб ишлаган. У гуруҳдаги беш нафар болага нисбатан жисмоний зўравонлик ишлатиб, уларни урган. Оқибатда болаларга соғлиқнинг бузилишига олиб келмаган енгил тан жароҳатлари етказилган.
7 апрель куни боғчага ёрдамчи тарбиячи сифатида ишга келган ходим ҳолатларни видеога олиб, фош қилган. Унинг айтишича, машғулот вақтида икки нафар бола уришиб қолганидан сўнг Н.Е. уларнинг юзига урган, ерга улоқтирган ва тепган.
Ходимнинг билдиришича, у тарбиячининг барча ҳаракатларини видеога олишга улгурмаган. Унинг сўзларига кўра, болалар ухламаган пайтларда ҳам тарбиячи асабийлашиб, уларга қўл кўтарган. Кейинчалик видеолардан бири болаларнинг ота-оналаридан бирига етиб борган.
Судда жабрланган болалардан бирининг онаси фарзандидаги ўзгаришларни видеолар тарқалишидан анча олдин сезганини айтган. Унинг сўзларига кўра, фарзанди сўнгги икки ойда боғчага боришни истамай, инжиқлик қила бошлаган. Бир куни боланинг оёғида кўкариш пайдо бўлган. Онаси нима бўлганини сўраганда, ҳали тўлиқ гапира олмайдиган фарзанди “урди”, деб жавоб берган.
Бошқа ота-оналар ҳам фарзандларининг танасида кўкариш ва тирналган жойларни кўрганини маълум қилган. Айрим болалар боғчага боришни истамай, йиғлайдиган ва қўрқадиган бўлиб қолган.
Болалардан бири доимий йиғлагани сабабли неврологга олиб борилган. Онаси кейинчалик фарзанди бошқа болалар билан аралаша олмай қолгани, баланд овоз эшитганда қулоқларини беркитиб, қўрқишини айтган. Ҳозирда бола билан психолог ва логопед мунтазам шуғулланмоқда.
Ота-оналар болалардаги жароҳатлар ҳақида сўраганда эса тарбиячи уларни болаларнинг йиқилиши ёки ўзаро уришиб қолиши билан изоҳлаб келган.
Н.Е. судда айбига қисман иқрор бўлган. У болаларни урганини тан олган, бироқ бу ҳолат мунтазам содир бўлмаганини айтган.
“Гуруҳдаги болалардан бири доим шовқин қилиб, бошқа болаларни тишларди. Бу ҳақда унинг онасига айтганимда, у ‘Агар айтганингизни қилмаса, оёғидан уринг’, деганди. Ўша куни айрим болаларни урганман, тепганман, қулоғидан тортганман. Оилавий келишмовчиликлар сабаб асабий эдим. Бироқ болаларни мунтазам урмаганман”, деган судланувчи.
Иш бўйича ўтказилган психологик текширувда болаларда тарбиячи билан боғлиқ оғир травматик ҳолат, қўрқув ва жисмоний зўравонлик аломатлари мавжудлиги қайд этилган. Мутахассиснинг хулосасига кўра, тарбиячининг сурати кўрсатилганда болалар чўчиб, ота-онасига интилган.
Суд жабрланувчилар ва гувоҳларнинг кўрсатмалари, видеотасвирлар, суд-тиббий экспертизаси хулосалари ҳамда психологик текширув натижаларини Н.Е.нинг айбини тасдиқловчи далиллар сифатида баҳолаган.
Жиноят ишлари бўйича Навоий шаҳар суди Н.Е.ни Жиноят кодексининг 110-моддаси 2-қисми “а” ва “в” бандларида назарда тутилган жиноятни содир этганликда айбли деб топган.
Суд унга 3 йил 3 ой муддатга озодликдан маҳрум қилиш жазосини тайинлаган. Шунингдек, Н.Е. 2 йил муддатга мактабгача таълим муассасаларида тарбиячи вазифасида ишлаш ҳуқуқидан маҳрум қилинган.
Маълум бўлишича, ушбу хусусий боғчада тарбиячи ишдан бўшатилган ва муассаса фаолияти вақтинча тўхтатилган.
