Эрон АҚШга Форс кўрфазида сулҳни қайта тиклаш ва Ҳурмуз бўғозини очиш бўйича юборган сўнгги таклифига Вашингтоннинг расмий жавобини олган. Бироқ жавоб мазмуни ҳозирча очиқланмаган.
Эрон Ташқи ишлар вазири Аббос Ароқчий АҚШнинг жавобини мамлакат Президенти Масъуд Пезешкиён ва ҳукуматга етказган. Бу ҳақда Эрон ҳукумати вакили Фотима Муҳожироний 30 сентябрь куни маълум қилди.
Аввалроқ, 27 сентябрь куни АҚШ Президенти Дональд Трамп Теҳроннинг таклифини рад этганини айтган эди. Бироқ Ароқчий ўша куни Эрон Вашингтондан расмий жавоб олмаганини билдирган.
Эрон томони ўтган ҳафта АҚШ билан келишувни тиклаш бўйича етти кунлик режани илгари сурган. Унга кўра, Вашингтон Эрон портларига нисбатан денгиз блокадасини бекор қилиши, айрим санкцияларни енгиллаштириши ва музлатилган активларни бўшатиши керак. Шундан сўнг Теҳрон Ҳурмуз бўғозини етти кун ичида нормал денгиз қатнови учун очишни таклиф қилган.
Томонлар ўртасидаги мулоқотларда Қатар воситачилик қилмоқда. Қатарлик воситачилар Нью-Йоркда БМТ Бош Ассамблеяси доирасида АҚШ ва Эрон вакиллари ўртасида билвосита музокаралар ўтказган. Кейинчалик улар Вашингтоннинг жавобини Теҳронга етказган.
Музокаралардан хабардор расмийнинг айтишича, томонлар келишув учун зарур бўлган чораларнинг мазмуни бўйича катта фарққа эга эмас. Асосий келишмовчилик уларни қайси тартибда амалга ошириш масаласида қолмоқда.
Эрон таклифи июнь ойида АҚШ ва Эрон ўртасида эришилган, кейинчалик барбод бўлган вақтинчалик келишувни қайта тиклашга қаратилган. Унда ядровий масала ва Ҳурмуз бўғозидаги денгиз қатнови бўйича қадамлар ҳам назарда тутилган.
