АҚШнинг Теннесси штатида қарийб 30 йилдан буён ўлим жазосини кутиб келаётган 50 ёшли Криста Пайкка нисбатан ўлим жазосини ижро этиш жараёни муваффақиятсиз якунланди. Унга икки марта пентобарбитал юборилганига қарамай, Пайк тирик қолган ва кейинчалик шифохонага олиб кетилган. Бу ҳақда АҚШ оммавий ахборот воситалари хабар берди.
Қайд этилишича, Пайк 1995 йилда 18 ёшда бўлган вақтида собиқ синфдоши Коллин Слеммерни ўлдиргани учун ўлим жазосига ҳукм қилинган. У Теннессида ўлим жазосини кутаётган ягона аёл маҳбус эди.
Пайкка нисбатан жазони ижро этишдан бир неча соат олдин АҚШ Апелляция суди жараённи вақтинча тўхтатган. Бироқ кейинчалик АҚШ Олий суди ушбу қарорни бекор қилиб, қатлни давом эттиришга рухсат берган.
Шундан сўнг унга икки доза пентобарбитал юборилган. Бироқ гувоҳларнинг айтишича, Пайк ҳали ҳам нафас олаётган ва қарийб бир соат давомида тирик қолган. Кейин у тез ёрдам машинасида тиббий муассасага олиб кетилган. Унинг ҳозирги аҳволи ҳақида адвокатларига ҳам маълумот берилмаган.
Теннесси тузатиш муассасалари департаменти Пайкка нисбатан қонуний тартибда белгиланган қатл протоколига амал қилинганини маълум қилди. Штат губернатори Билл Ли эса воқеани учинчи томон иштирокида ҳар томонлама текширишни буюрган ва йил охиригача режалаштирилган бошқа қатлларни тўхтатган.
