Илон Маск АҚШ президенти Дональд Трамп маъмурияти билан ҳамкорликка қайтди. У Пентагоннинг келажакдаги урушлар қандай бўлиши ва бунинг учун қандай қурол ҳамда технологиялар зарурлигини ўрганувчи янги "Project Meridian" ташаббусига ҳамраислик қилади. Бу ҳақда АҚШ Мудофаа вазири Пит Ҳегсет маълум қилди.
Маълум қилинишича, "Project Meridian" доирасида АҚШ армияси келажакда қайси ҳарбий соҳаларда устунликка эга бўлиши кераклиги, шунингдек, бунинг учун қандай илғор технологияларни ишлаб чиқиш ва жорий этиш зарурлиги ўрганилади.
Лойиҳага Илон Маскдан ташқари мудофаа технологиялари компанияси «Anduril Industries» асосчиси Палмер Лаки ва АҚШ Конгресси Вакиллар палатасининг собиқ спикери Ньют Гингрич ҳам ҳамраислик қилади. Лойиҳанинг умумий ишига АҚШ Мудофаа вазирлигининг тадқиқот ва муҳандислик йўналиши учун масъул раҳбари Эмил Майкл бошчилик қилади.
"Project Meridian" иштирокчилари сунъий интеллект, робототехника ва автоном тизимлар каби технологияларнинг келажакдаги ҳарбий амалиётлардаги ўрнини ҳам таҳлил қилади. Лойиҳа якунлари бўйича хулоса ва тавсияларни 120 кун ичида тайёрлаш режалаштирилган.
Бу Илон Маскнинг Трамп маъмуриятидаги аввалги фаолиятидан кейинги расмий қайтиши ҳисобланади. Маск 2025 йилда Ҳукумат самарадорлиги департаменти — DOGE тузилмасини бошқарган. Кейинчалик у Трамп билан очиқ келишмовчиликка бориб, маъмуриятни тарк этган эди. Кейин иккиси муносабатларини тиклаган.
"Project Meridian" Пентагон томонидан эълон қилинган ягона янги ташаббус эмас. Ҳегсет шунингдек, дронлар ва автоном қурилмалардан фойдаланишни мувофиқлаштирувчи янги тўрт юлдузли ҳарбий қўмондонлик — "Autonomous Warfare Command" ташкил этилишини маълум қилган.
