Дубайдан Тель-Авивга йўл олган Flydubai самолётида иккинчи пилотнинг ҳужуми оқибатида оғир жароҳат олган капитан Смит Маччҳар ҳодисадан сўнг биринчи марта воқеа тафсилотларини сўзлаб берди. У бу ҳақда Ҳиндистон Бош вазири Нарендра Моди билан видеомулоқот чоғида гапирди.
Ҳодиса 30 сентябрь куни Flydubai’нинг FZ1073 рейсида содир бўлган. Самолёт Дубайдан Тель-Авивга учиб кетаётган вақтда иккинчи пилот кабинада капитанга ҳужум қилган. Оғир жароҳат олган Маччҳар шунга қарамай қаршилик кўрсатишда давом этган.
Капитаннинг сўзларига кўра, у кабина полида ётганида самолёт пастга шўнғиётганини ҳис қилган ва вазият қандай якунланиши мумкинлигини тушунган.
“Полда ётганимда самолёт пастга шўнғиётганини ҳис қилдим. Бунинг нима билан якунланишини аниқ тушуниб турардим. Эшик жуда яқин эди. Мени калтаклашда давом этишаётганига қарамай, эшикни очдим. Шунда бошқалар ичкарига кириб келишди”, — деди Маччҳар.
Шундан сўнг бир неча йўловчи кабинага кириб, ҳужумчини зарарсизлантиришга муваффақ бўлган. Самолёт бошқарувини эса бортида бўлган бошқа учувчилар ўз қўлига олган. Кейин ҳаво кемаси Саудия Арабистонига фавқулодда қўнган.
Маччҳар воқеа пайтида кўп миқдорда қон йўқотган ва оғир жароҳат олган. У дастлаб Саудия Арабистонида тиббий ёрдам олган, кейинчалик Абу-Дабидаги шифохонага ўтказилган. Айни пайтда у ерда даволанмоқда.
Капитан 17 йилдан бери парвоз қилиб келаётганини, шундан 11 йилини ҳаво кемаси командири сифатида ўтказганини айтди.
“Ўша пайтда мен ўз ҳаётим учун курашаётган эдим. Жуда оғир жароҳат олганимдан сўнг йиқилиб тушдим. Хаёлимдан “Агар қайтиб оёққа тура олмасам-чи?” деган фикр ўтди”, — деди у.
Маччҳарнинг таъкидлашича, у нафақат ўз ҳаётини сақлаб қолиш, балки самолётдаги бошқа йўловчиларнинг ҳам ҳаётини асраш зарурлигини англаган.
“Ҳатто кўзларим юмиқ бўлса ҳам, самолётимда нима юз бераётганини аниқ биламан”, — деди учувчи.
Ҳужум қилган иккинчи пилотнинг шахси расмий равишда ошкор этилмаган. Унинг Уммон фуқароси экани ҳақида маълумот берилган. Гумонланувчи Саудия Арабистонидан Бирлашган Араб Амирликларига ўтказилган. Унга нисбатан терроризм билан боғлиқ модда бўйича тергов олиб борилмоқда.
БАА Президентининг дипломатик масалалар бўйича маслаҳатчиси Анвар Гаргаш ҳодисани “хавфли террорчилик ҳаракати” деб атаган.
Гумонланувчининг ҳужумдан кўзлаган мақсади, шунингдек, воқеа вақтида қандай қуролдан фойдалангани ҳозирча расман маълум қилинмаган. Исроил Бош вазири Биньямин Нетаньяху ҳужумчи пичоқ ёки болтадан фойдаланган бўлиши мумкинлигини айтган.
