Олий Мажлис Сенатининг 20-ялпи мажлисида болаларга нисбатан зўравонлик учун жазони кучайтиришга қаратилган қонун муҳокамаси чоғида сенатор Рустам Калонов болаларга нисбатан жинсий жиноят содир этган шахсларни жарроҳлик йўли билан кастрация қилиш масаласини кўриб чиқишни таклиф қилди.
2 октябрь куни бўлиб ўтган ялпи мажлисда “Болаларни зўравонликнинг барча шаклларидан ҳимоя қилиш тизими такомиллаштирилиши муносабати билан Ўзбекистон Республикасининг айрим қонун ҳужжатларига ўзгартириш ва қўшимчалар киритиш тўғрисида”ги қонун муҳокама қилиниб, Сенат томонидан маъқулланган.
Мажлис давомида “Нуроний” жамғармасининг Тошкент шаҳар бўлими раиси, сенатор Рустам Калонов болаларга нисбатан жинсий жиноят содир этган шахсларга нисбатан кастрация қўллаш имкониятини кўриб чиқишни таклиф этди.
У айрим давлатларда бундай жиноятларни содир этган шахсларга нисбатан жарроҳлик йўли билан кастрация қўлланилишини мисол қилиб келтирди.
“Улар агар билинмай қолиб, ўтиб кетса, яна шу жиноятини қайтариши мумкин. Шунга биз йўл қўймаслигимиз керак. Менинг таклифим шу, агар қўшимча қилиш бўлса, яхши бўларди”, деди сенатор.
Сенат раиси Танзила Норбоева эса аввало янги қабул қилинган қонуннинг амалиётда қандай ишлашини кузатиш кераклигини билдирди. У зарурат туғилса, кейинчалик қонунчиликни яна такомиллаштириш мумкинлигини айтди.
“Бу қонунни ҳам ҳозир кўрайлик, қанақа ишлайди. Шундан кейин такомиллаштиришни давом эттираверамиз”, деди Сенат раиси.
Қайд этилишича, Сенат маъқуллаган қонун билан 14 ёшга тўлмаган болаларга нисбатан айрим жинсий зўравонлик жиноятлари учун 25 йилгача ёки умрбод озодликдан маҳрум қилиш жазоси жорий этилмоқда. Шунингдек, ушбу тоифадаги жиноятлар бўйича жавобгарликка тортиш ва ҳукмни ижро этиш муддати ўтиб кетганлиги қўлланилмайди.
Бундан ташқари, боланинг ўлимига сабаб бўлган қасддан жиноят содир этган шахсларга нисбатан шартли ҳукм қилиш ҳамда муддатидан илгари шартли озод қилиш тақиқланмоқда. Қонун доирасида зўравонликдан жабрланган болаларни суд ва тергов жараёнида қайта руҳий жароҳатланишдан ҳимоя қилишга қаратилган бир қатор процессуал механизмлар ҳам белгиланмоқда.
