Ўзбекистонда сув олиш тартибини бузган юридик шахсларга нисбатан молиявий санкциялар жорий этилмоқда. Биринчи марта қоидабузарлик содир этган ва бошқаларнинг ҳаёти, соғлиғи ёки мулкига зарар етказмаган юридик шахсларга эса “Биринчи хато учун — тиклаш” тамойили асосида ёндашилади. Бу ҳақда жорий йил 21 октябрдаги 585-сонли қарорда белгиланган.
Қарорга кўра, қишлоқ хўжалиги, балиқчилик, саноат, энергетика ҳамда хўжалик-маиший эҳтиёжлар учун сув олишда қуйидаги қоидабузарликлар учун жавобгарлик белгиланади:
-
белгиланган лимитдан ортиқ сув олиш;
-
сув олишни расмийлаштирмасдан сувдан фойдаланиш;
-
сув олиш жойларини сувни бошқариш ва ҳисобга олиш воситалари билан жиҳозламаслик;
-
сувдан фойдаланиш учун рухсатномасиз сув олиш;
-
ўзбошимчалик билан сув олиш.
2027 йил 1 январдан бошлаб, биринчи марта қоидабузарлик содир этган, бироқ бошқа шахсларнинг ҳаёти, соғлиғи ёки мулкига зарар етказмаган юридик шахсларга “Биринчи хато учун — тиклаш” тамойили қўлланилади.
Бунда Инспекция юридик шахсга “suvnazorat.uz” электрон платформаси орқали кўрсатма юборади ва қоидабузарликни бартараф этиш учун 10 кун муддат беради. Белгиланган муддатда камчиликлар бартараф этилмаса, тегишли молиявий санкциялар қўлланилади.
Жарималар миқдори Сув кодексининг 164-моддасида белгиланган меъёрларга мувофиқ, ҳар минг куб метр сув учун базавий ҳисоблаш миқдорига (БҲМ) нисбатан ҳисобланади. Санкция қўлланилганидан кейин бир йил ичида қоидабузарлик такрорланса, жарима беш баравар миқдорда белгиланади.
Қарор ва жарима тўлаш тўғрисидаги ҳужжат олинган кундан бошлаб бир ой ичида белгиланган сумманинг 50 фоизи тўланса, юридик шахс жариманинг қолган қисмини тўлашдан озод этилади.
Шунингдек, жаримани олти ойдан кечиктирмай, ҳар ойда камида тегишли қисмини тўлаш шарти билан бўлиб-бўлиб тўлаш мумкин. Бир ой ичида дастлабки тўлов амалга оширилса, бўлиб тўлаш тартиби автоматик равишда қўлланилади.
Санкция белгиланган тартибда тўлиқ тўланган тақдирда, юридик шахсга нисбатан ушбу молиявий чора қўлланилмаган деб ҳисобланади.
Агар бир ой ичида тўлов амалга оширилмаса, Инспекция қарзни ундириш учун судга мурожаат қилиши мумкин. Санкция устидан шикоят қилинса, шикоят кўриб чиқилгунга қадар унинг ижроси тўхтатиб турилади.
Суд санкцияни ноқонуний ёки асоссиз деб топган тақдирда, аввал ундирилган маблағлар 15 кун ичида қайтарилади. Маблағ ўз вақтида қайтарилмаган ҳар бир календарь кун учун Марказий банкнинг асосий ставкаси бўйича уч юздан бир миқдорда фоиз тўланади.
