Адлия вазирлиги "Урганч–Хива" пулли автомобиль йўлидан фойдаланиш тартиби тўғрисидаги вақтинчалик низомни давлат рўйхатидан ўтказди.
Унга кўра, оператор йўл ишга тушишидан олдин тарифлар, тўлов усуллари ва муқобил бепул йўл ҳақида маълумот бериши керак. Тўловларни электрон ҳисоб, тўлов пункти ёки кечиктирилган тўлов орқали амалга ошириш мумкин.
Йўл ҳақи транспорт воситаси тоифасига қараб белгиланади ва Транспорт вазирлиги белгилаган энг юқори миқдордан ошмаслиги лозим.
Фойдаланувчилар тўлов тарихи ва қарздорлигини текшириш, нотўғри ҳисобланган маблағни қайта ҳисоблашни талаб қилиш ҳамда оператор ҳаракатлари устидан шикоят қилиш ҳуқуқига эга.
Кечиктирилган тўлов беш иш куни ичида амалга оширилиши керак. Низом расмий эълон қилинган кундан кучга киради.
Аввалроқ енгил автомобиллар учун "Урганч–Хива" йўлининг тўлиқ қисми бўйича тўлов 25 минг сўм, 28 километрлик қисқа йўналиш учун эса 20 минг сўм бўлиши айтилган эди.
