АҚШ президенти Дональд Трамп сунъий интеллект бўйича янги махсус гуруҳ тузилганини маълум қилди. "Супер интеллект кучлари" деб номланган гуруҳга Миллий разведка директори Жей Клейтон раҳбарлик қилади. Бу ҳақда BBC нашри хабар қилди.
Трампнинг айтишича, гуруҳ АҚШнинг сунъий интеллектни ривожлантиришдаги етакчи мавқеини сақлаб қолиш, шунингдек, ҳукуматнинг технология соҳасидаги фаолиятини мувофиқлаштириш билан шуғулланади.
Янги тузилма федерал ҳукуматнинг истеъмолчилар, жамоат ташкилотлари, диний ташкилотлар, муҳим инфратузилма операторлари ва сунъий интеллект компаниялари билан ҳамкорлигини ҳам мувофиқлаштиради.
Гуруҳ таркибига Федерал савдо комиссияси раиси Эндрю Фергюсон ва Мудофаа вазирлигининг тадқиқот ҳамда муҳандислик бўйича ўринбосари Эмил Майкл ҳам кирган.
Бу қарор сунъий интеллектни тартибга солишни кучайтириш бўйича чақириқлар ортиб бораётган бир пайтда қабул қилинди. Трамп эса технология устидан янада кучли назорат ўрнатиш таклифларини рад этиб, соҳани асосан компанияларнинг ўзини ўзи тартибга солишига қолдириб келган.
29 сентябрь куни OpenAI, Anthropic, SpaceX ва Google каби йирик технология компаниялари раҳбарлари сунъий интеллектни тартибга солиш бўйича келишувни имзолаган.
Шунингдек, Трамп сунъий интеллект атамасини "супер интеллект" деб қайта номлаш тўғрисида фармон имзолаган. Илон Маск эса ўз компаниясининг AI платформаси SpaceXAI номини SpaceXSI деб ўзгартиришини маълум қилди.
