Ўзбекистонда ички йўналишлар бўйича авиачипталар нархи 16 октябрдан бошлаб ўртача 20 фоизгача пасайтирилади. Бу ҳақда Рақобатни ривожлантириш ва истеъмолчилар ҳуқуқларини ҳимоя қилиш қўмитаси хабар берди.
Маълум қилинишича, қўмита Президент Шавкат Мирзиёев топшириқлари ижросини таъминлаш мақсадида авиация бозоридаги тарифлар, нархларнинг шаклланиши ва хизматлардан фойдаланиш имкониятларини ўрганган.
Ўрганишлар давомида ички авиақатновлар билан боғлиқ харажатларни мақбуллаштириш имкониятлари таҳлил қилиниб, чипталар нархини тушириш бўйича таклифлар ишлаб чиқилган. Ушбу таклифлар тегишли идоралар томонидан қўллаб-қувватланган.
Шундан сўнг Рақобат қўмитаси "Uzbekistan Airways" авиакомпанияси билан ҳамкорликда ички йўналишлар тарифларини қайта кўриб чиққан.
Қайд этилишича, нархларнинг пасайтирилиши аҳолининг авиақатновлардан фойдаланиш имкониятларини кенгайтириш, ички туризмни ривожлантириш ҳамда ҳудудлар ўртасида ҳаракатланишни осонлаштиришга хизмат қилади.
