Тошкент шаҳрида Фарғона йўли кўчасининг икки йўналишидаги автобуслар учун ажратилган 6 километрлик "А" йўлакларига ҳаракатни назорат қилувчи камералар ўрнатилди. Бу ҳақда пойтахт транспорт инфратузилмасини ривожлантириш бўйича эълон қилинган маълумотда хабар берилди.
Қайд этилишича, жамоат транспорти ҳаракатига устуворлик бериш мақсадида пойтахтнинг бошқа кўчаларидаги автобус йўлакларига ҳам назорат камералари босқичма-босқич ўрнатилмоқда.
Маълум қилинишича, бир автобусда бир вақтнинг ўзида 50 нафардан ортиқ йўловчи бўлиши мумкин. Шу боис бошқа транспорт воситаларининг автобус йўлакларига кириши жамоат транспорти ҳаракатига тўсқинлик қилиб, йўловчиларнинг манзилига кечикиб етиб боришига сабаб бўлади.
Эслатиб ўтилишича, соат 06:00 дан 23:00 гача "А" йўлакларида ҳаракатланиш ҳуқуқига эга бўлмаган транспорт воситаларининг ҳаракатланиши тақиқланади.
Ҳайдовчилардан йўл белгилари ва чизиқлари талабларига риоя қилиш ҳамда автобуслар учун ажратилган йўлакларни банд қилмаслик сўралган.
