Ўзбекистонлик режиссёр Рашид Маликовнинг фильми Москвада ўтказилган X халқаро "Евросиё кўприги" кинофестивалида энг яхши бадиий фильм деб топилди. Бу ҳақда расмий ахборот канали хабар берди.
Қайд этилишича, 5–9 октябрь кунлари Москва шаҳрида ташкил этилган юбилей фестивалида 14 та мамлакатдан фильмлар иштирок этган. Унда ўзбекистонлик режиссёрнинг инсон тақдири ҳақидаги асари энг юқори эътирофга сазовор бўлган.
Фильм ҳаёт қийинчиликларини енгиб, яшашдан янги маъно излаётган аёл тақдири ҳақида ҳикоя қилади. Унда инсоннинг ички кечинмалари, синовлар қаршисида ўзини йўқотмаслик ва ҳаётини қайтадан қуришга интилиши акс эттирилган.
Мазкур фильмнинг жаҳон премьераси 2025 йил ноябрь ойида Қоҳира халқаро кинофестивалида бўлиб ўтган. 2026 йил июль ойида эса асар Сочи шаҳрида ўтказилган "Евразия кинофести" фестивалида "Энг яхши сценарий" мукофотини қўлга киритган.
Рашид Маликовнинг халқаро ютуқлари шу билан чекланмаяпти. Айни пайтда режиссёр Контент маркази билан ҳамкорликда 2027 йил 4–5 февраль кунлари Тошкентда илк бор ўтказилиши режалаштирилган Tashkent Content Market халқаро тадбирига тайёргарлик кўришда иштирок этмоқда.
Таъкидланишича, бундай халқаро майдонлар ўзбек киноижодкорларига хорижий ҳамкорлар билан алоқаларни кенгайтириш, лойиҳаларини жаҳон бозорига олиб чиқиш ва янги ижодий ҳамкорликларни йўлга қўйиш имконини беради.
