Сурхондарё вилояти Денов туманида укаси курашда мағлуб бўлганидан кейин ғолиб полвоннинг отасини пичоқлаб ўлдирган эркак 19 йилга озодликдан маҳрум қилинди. У муқаддам икки марта судланган.
Маълум қилинишича, воқеа 2026 йил 9 май куни Хотира ва қадрлаш куни муносабати билан Денов туманидаги тиббиёт техникуми ўйингоҳида ўтказилган кураш мусобақасида содир бўлган.
Ўша куни эркак укасининг беллашувини томоша қилиш учун майдонга борган. Бироқ укаси рақибига мағлуб бўлганидан кейин жаҳл билан у ерни тарк этган.
Кейинроқ у отаси билан ғолиб полвоннинг отаси ўртасида тортишув бўлганини эшитиб, ортга қайтган. Соат 13:30 атрофида техникумга етиб келган эркак ўйингоҳга кириш қисмидаги озиқ-овқат дўконидан ошхона пичоғини яширинча олган.
Шундан сўнг у ғолиб полвоннинг отаси олдига бориб, унинг орқаси ва биқинига тўрт марта пичоқ санчган.
Судда кўрсатув берган судланувчи воқеа жаҳл устида содир бўлганини айтган. Унинг таъкидлашича, отаси ҳақидаги хабарни эшитгач, хавотирланиб ортга қайтган. Дўкондан пичоқни ўзини ҳимоя қилиш мақсадида олганини билдирган.
Ҳодиса вақтида судланувчи жабрланувчининг қаршилигига қарамай, унинг юзига боши билан ҳам зарба берган ва яна пичоқ санчишга уринган. Бироқ атрофдагилар уларни ажратиб олган.
Жабрланувчи шифохонага олиб борилган, аммо олган жароҳатлари оқибатида жонлантириш бўлимида вафот этган.
Суд ҳукми билан эркак Жиноят кодексининг 97-моддаси 2-қисми «ж» ва «л» бандларида назарда тутилган қасддан одам ўлдириш жиноятини содир этганликда айбли деб топилган. Унинг муқаддам икки марта судлангани ҳам ҳисобга олиниб, аввалги жазосининг ўталмай қолган қисми қўшилган ҳолда, узил-кесил 19 йилга озодликдан маҳрум қилиш жазоси тайинланган.
