АҚШ федерал суди Давлат департаментига DV-2027 Грин-карта лотереяси учун аризалар қабул қилишни бошлаш мажбуриятини юклади. Суд қарори 2026 йил 14 октябрь куни Калифорния штатидаги Сан-Диего федерал суди томонидан чиқарилган.
Америка оммавий ахборот воситалари хабарларига кўра, қарорда аризаларни қабул қилиш ойнасини 2026 йил 18 октябрдан кечиктирмай очиш ҳамда танлаб олинган иштирокчиларни 19 ноябрга қадар хабардор қилиш белгиланган. Рўйхатдан ўтишнинг аниқ санаси АҚШ Давлат департаменти томонидан эълон қилиниши керак.
Аввалроқ Давлат департаменти лотереянинг кечикишини иштирок этиш тартибига киритилаётган ўзгаришлар билан изоҳлаган эди. 2025 йил ноябрь ойида идора DV-2027 дастури учун рўйхатдан ўтиш санаси кейинроқ маълум қилинишини билдирган. Бироқ аризаларни қабул қилиш жараёни ҳануз бошланмаганди.
Лотереяда иштирок этиш учун қандай талаблар бор?
DV-2027 дастурида иштирокчилар учун бир қатор янги талаблар жорий этилиши назарда тутилган. Жумладан:
-
ариза топшириш учун амалдаги хорижга чиқиш паспорти талаб этилади;
-
электрон анкетага шахсий маълумотлар ва паспортнинг имзо қўйилган саҳифаси сканерланган нусхасини юклаш керак бўлади;
-
рўйхатдан ўтиш учун 1 доллар миқдорида тўлов жорий этилади.
Мазкур ўзгаришлар фирибгарлик ва бир шахс томонидан бир нечта ариза топширилишининг олдини олишга қаратилган.
Аризалар АҚШ Давлат департаментининг расмий сайти — dvprogram.state.gov орқали қабул қилинади. Расмий йўриқнома эълон қилинмагунча иштирокчиларни олдиндан рўйхатдан ўтказишни ваъда қилаётган ёки лотереяда ғолиб чиқишни кафолатлаётган воситачиларга ишонмаслик тавсия этилади.
Суд қарорида танлаб олинган иштирокчиларни 2026 йил 19 ноябрга қадар хабардор қилиш белгиланган. Бироқ лотереяда ғолиб бўлиш АҚШда доимий яшаш ҳуқуқини автоматик равишда қўлга киритишни англатмайди. Ғолиблар иммиграция визасини олиш учун белгиланган кейинги босқичлардан ҳам ўтиши керак.
DV-2027 иштирокчилари учун жараённи якунлаш муддати ҳам чекланган. Дастур доирасида визалар 2027 йил 30 сентябрга қадар берилиши лозим.
Грин-карта нима ва у қандай ҳуқуқ беради?
Грин-карта (Green Card) — АҚШда доимий яшаш ҳуқуқини берувчи ҳужжат. Унинг эгалари Америкада яшаш ва ишлаш, қонунчиликда белгиланган шартлар асосида айрим ижтимоий имтиёзлардан фойдаланиш ҳамда келажакда фуқаролик олиш учун ариза топшириш ҳуқуқига эга бўлади.
Хилма-хиллик визаси лотереяси (Diversity Visa Lottery) ҳар йили ўтказилади. Унда АҚШга иммиграция кўрсаткичи паст бўлган мамлакатлар фуқаролари иштирок этиши мумкин. Ўзбекистон фуқаролари ҳам дастурда қатнашиш имкониятига эга.
Эслатиб ўтамиз, 2025 йил декабрь ойида АҚШ Ички хавфсизлик вазирлиги Грин-карта лотереяси дастурини тўхтатиш ҳақида эълон қилган эди. Ўша вақтда вазир Кристи Ноэм дастурни тўхтатиш қарори Президент Дональд Трамп топшириғи билан қабул қилинганини билдирган.
Унинг таъкидлашича, бунга Браун университети ва Массачусетс технология институтидаги отишмаларда гумон қилинган шахснинг 2017 йилда АҚШга айнан шу дастур орқали келгани сабаб бўлган. Мазкур ҳодисалардан бирида ўзбекистонлик талаба ҳам ҳалок бўлган эди.
