Ҳиндистонда 16 ёшли ўсмирнинг чап кўз қовоғи шишиб, бир неча ойдан кейин қовоқ билан қош орасидаги терини иккита ўткир учли оқ жисм тешиб чиқди. Текширувлар бу жисмлар битта тишнинг қисмлари эканини кўрсатди. Бу ҳақда "Medical Daily" нашри хабар берди.
Қайд этилишича, ноодатий ҳолат Ҳиндистоннинг Мадурай шаҳридаги Аравинд кўз касалхонаси шифокорлари томонидан ўрганилган. Мутахассислар мазкур клиник ҳолатни "Ophthalmology" илмий журналида баён қилган.
Шифокорларнинг маълум қилишича, ўсмирнинг кўз қовоғидаги шиш оғриқсиз бўлган. У тери орасидан тишга ўхшаш қаттиқ жисмлар чиқиб қолганидан тахминан бир ой ўтгач, шифохонага мурожаат қилган.
Дастлаб мутахассислар бу ҳолат тератома — таркибида соч, тиш ва бошқа тўқималар бўлиши мумкин бўлган ўсма ёки кўз қовоғига кириб қолган бегона жисм билан боғлиқ бўлиши мумкинлигини тахмин қилган.
Бироқ компьютер томографияси текшируви кўз косасининг юқори қисмида битта тиш борлигини кўрсатган. Қовоқ билан қош орасидаги терини тешиб чиққан иккита ўткир учли оқ жисм эса алоҳида тишлар эмас, балки битта тишнинг қисмлари бўлган.
Шундан сўнг шифокорлар тишни жарроҳлик йўли билан муваффақиятли олиб ташлаган.
Маълум қилинишича, ҳолат ҳақидаги илмий ҳисобот жорий йилнинг январь ойида интернетда эълон қилинган, кейинчалик эса журналнинг июнь сонида чоп этилган.
Ҳолатни ўрганган шифокор Мегана Танварнинг айтишича, бу кўз косасининг юқори қисмида жойлашган эктопик тишнинг тиббий адабиётларда қайд этилган биринчи ва ягона ҳолати ҳисобланади.
Эктопик тиш — одатда тиш чиқиши керак бўлган жойдан ташқарида ривожланадиган тишдир. Бундай ҳолат жуда кам учрайди.
