Рим папаси Лев XIV ўнг ўпкасидаги саратон ўсмасини олиб ташлаш бўйича операциядан кейин шифохонадан чиқарилди. У бугун, 17 октябрь куни Римдаги Жемелли шифохонасидан Ватиканга қайтиши кутилмоқда. Бу ҳақда Ватикан матбуот хизматига таяниб, “Euronews” хабар берди.
Қайд этилишича, 71 ёшли понтифик 13 октябрь куни ўнг ўпкасида ўтказилган операциядан кейин шифохонада даволанаётган эди.
Шифокорлар унинг қон таҳлиллари ва кўкрак қафаси рентген текшируви натижаларини баҳолаб, шифохонадан чиқиши мумкин, деган хулосага келган.
Ватикан матбуот хизмати маълумотига кўра, Лев XIV бугун тушдан кейин шифохонани тарк этиб, Ватиканга қайтади. 18 октябрь куни эса у папа қароргоҳи деразасидан туриб, анъанавий “Анжелус” ибодатини ўқиши режалаштирилган.
Аввалроқ, операция давомида папанинг ўнг ўпкаси пастки бўлагининг олиб ташлангани маълум қилинган эди. Шифокорлар унда ўпка аденокарциномаси — ўпка саратонининг бир тури аниқланганини билдирган.
Операция тахминан 90 дақиқа давом этган ва асоратларсиз якунланган. 15 октябрь куни ўтказилган рентген текшируви ҳам зарарланган ўпканинг тикланиши яхши кечаётганини кўрсатган.
