Франциянинг бир нечта шаҳрида ҳукуматга қарши намойишлар вақтида машҳур брендлар дўконлари ва савдо нуқталари талон-торож қилинди. Ҳодисалар Париж, Марсель, Лилль ва Ницца шаҳарларида кузатилган. Бу ҳақда “LiFO” нашри хабар берди.
Маълум қилинишича, 17 октябрь куни бўлиб ўтган оммавий намойишлар давомида айрим шахслар вазиятдан фойдаланиб, савдо нуқталарига бостириб кирган ва у ердаги товарларни олиб кетган. Ҳодисалар нафақат қимматбаҳо буюмлар дўконларида, балки техника дўконлари, нонвойхоналар ва супермаркетларда ҳам содир бўлган.
Парижда CELINE, Dior, Burberry ва Louis Vuitton брендларининг дўконларига зарар етказилган. Республика майдони яқинидаги косметика дўконининг витринаси синдирилиб, ичкаридаги маҳсулотлар ташқарида тўпланган одамларга улоқтирилган.
Шунингдек, телекоммуникация дўконига бостириб кирган шахслар телефонларни кўчага отган. Республика майдонидаги ёдгорлик турли ёзувлар билан қопланган, майдондаги тошларнинг бир қисми кўчирилган. “La Barrique” барида эса ёнғин чиққан.
Яқин атрофдаги супермаркетдан спиртли ва газланган ичимликларни олиб чиққан айрим намойишчилар уларни полиция ходимларига қарата отган.
Тартибсизликлар Франциянинг бошқа шаҳарларида ҳам кузатилган. Марселда Hermès дўкони, заргарлик буюмлари, кийим-кечак, косметика ва маиший техника сотиладиган савдо нуқталарига зарар етказилган. Шунингдек, пойабзал дўконида чиққан ёнғинни ўчириш учун ўт ўчирувчилар жалб қилинган.
Лилль шаҳрида савдо нуқталарида вандализм ҳолатлари қайд этилган. Шаҳар мэри Арно Деланднинг айтишича, айрим шахслар шаҳар марказидаги Apple Store дўконига ҳам бостириб кирган.
Ниццада эса спорт кийимлари дўконлари ва мотоцикллар савдоси билан шуғулланувчи марказ талон-торож қилинган.
Қайд этилишича, дастлаб мактаблардаги таълим шароитларини яхшилаш талаблари билан бошланган намойишлар кейинчалик ҳукуматга қарши кенг кўламли норозилик ҳаракатига айланган. Намойишчилар яшаш харажатларининг қимматлашиши ва аҳолига тушаётган иқтисодий босимдан норози эканини билдирган.
