Россиянинг Санкт-Петербург шаҳри ва Ленинград вилояти 18 октябрь куни Украина дронлари ҳужумига учради. Ҳодиса оқибатида бир киши ҳалок бўлган, 15 киши жароҳатланган. Қатор инфратузилма объектлари, турар жой бинолари ва автомобилларга зарар етган. Бу ҳақда "Медуза" хабар берди.
Маълум қилинишича, ҳужум оқибатида Санкт-Петербургдаги порт нефть терминали, «Ручьи» нефть базаси, "Озон" омбори, VK маълумотлар маркази, "Восточная" электр подстанцияси ва кўприк шикастланган. Шунингдек, Васильевский оролидаги наркология шифохонасига ҳам зарар етган.
Шаҳар ва вилоятда ўнлаб автомобиллар ҳамда турар жой бинолари ҳам шикастланган.
Ҳужум вақтида Санкт-Петербургнинг бир нечта туманида электр таъминоти узилган. Пулково аэропорти эса саккиз соат давомида фаолиятини тўхтатган. Ҳозирда аэропорт яна рейсларни қабул қилиш ва жўнатишни бошлаган.
Ленинград вилоятида ҳам дронлар ҳужуми оқибатлари қайд этилган. Хусусан, Гатчина ва Всеволожск шаҳарларида дрон парчалари тушиши натижасида кўп қаватли уйларга, Кировск туманида эса хусусий уйга зарар етган.
Ломоносов туманидаги Низино қишлоғида тўхтаб турган тўртта автомобилда ёнғин чиққан. Новоселье шаҳрида эса 55 та автомобиль шикастланган.
Нашрнинг қайд этишича, бу ҳужум уруш бошланганидан бери Санкт-Петербург ва Ленинград вилоятига уюштирилган энг йирик дрон ҳужумларидан бири бўлиши мумкин.
