Франция пойтахти Парижда яшаш харажатлари ошишига қарши намойишлар давом этмоқда. 19 октябрь куни намойишчилар дунёнинг энг машҳур музейларидан бири — Луврга кириш йўлларини тўсиб қўйди. Оқибатда музей ташриф буюрувчилар учун белгиланган вақтда очилмади. Бу ҳақда «Евроньюс» хабар берди.
Акцияда Лувр мактаби (École du Louvre) талабалари етакчилик қилган. Улар Францияда сўнгги ҳафталарда давом этаётган норозилик чиқишларини қўллаб-қувватлаб, полициянинг намойишчиларга нисбатан ҳаракатларини танқид қилган.
Музей ташқарисига илиб қўйилган варақада намойишчилар Луврга киришни тўсиб қўйганини маълум қилган. Акция иштирокчилари шу орқали жамоатчилик эътиборини мамлакатдаги ижтимоий муаммоларга қаратишга уринган.
Франциядаги норозиликлар дастлаб ўрта мактаб ўқувчиларининг таълим муассасаларидаги шароитларни яхшилаш талаблари билан бошланган. Кейинчалик ҳаракат яшаш харажатларининг ошиши ва бошқа ижтимоий муаммоларга қарши норозиликларни ҳам қамраб олган.
Дам олиш кунлари мамлакатнинг бир қатор ҳудудларида намойишлар тартибсизликлар билан кечган. Айрим гуруҳлар полицияга ҳужум қилган, давлат идоралари ва бошқа жамоат биноларига зарар етказган, дўконларни талон-торож қилган ҳамда транспорт воситаларига ўт қўйган.
Франция Президенти Эммануэль Макрон хавфсизлик чораларини қайта кўриб чиқиш бўйича топшириқ берган. Мамлакат ички ишлар вазири Лоран Нуньес эса тартибсизликлар вақтида хавфсизлик кучлари вазиятни назорат қилишда қийинчиликларга дуч келганини тан олган.
Яшаш харажатлари ва уй-жой нархларининг ошишига қарши норозиликлар Европанинг бошқа мамлакатларида ҳам кузатилмоқда. Жумладан, Италия, Испания ва Португалияда ҳам шу каби муаммоларга қарши акциялар ўтказилган.
