Францияда дам олиш кунлари юз берган тартибсизликлар ва талончиликлардан сўнг Парижнинг айрим ҳудудлари ҳамда бошқа шаҳарларда тунги комендантлик соати жорий этилди. Бу ҳақда BBC хабар берди.
Парижда Республика майдони ва Les Halles савдо ҳудудида соат 23:00 дан 06:00 гача ҳаракатланиш чекланди. Шунингдек, шаҳар марказининг айрим қисмларида рухсатсиз йиғилишлар тақиқланди. Марсель, Бордо, Ницца, Лион ва Лилль шаҳарларида ҳам қисман чекловлар эълон қилинди.
Франция бош вазири Себастьен Лекорню зарурат туғилса, мамлакатда фавқулодда ҳолат жорий этилиши мумкинлигини истисно қилмади. У тартибсизликлардан зарар кўрган ҳудудларни тиклаш учун маблағ ажратилишини, бироқ зарар етказганлардан товон ундирилишини билдирди. Шунингдек, ишлай олмаган фуқаролар учун қисман ишсизлик нафақаси жорий этилишини маълум қилди.
Ички ишлар вазири Лоран Нуньес айрим шаҳарларда полиция вазият назоратини йўқотганини тан олди. У тартибсизликларга тайёргарлик етарли бўлмагани учун танқидга учраган ва истеъфога чиқишга уринган, аммо президент Эммануэль Макрон унинг аризасини қабул қилмаган.
Расмий маълумотларга кўра, тартибсизликлар давомида 2,5 мингдан ортиқ киши ҳибсга олинган, қарийб 1 минг нафар полиция ходими жароҳатланган. AFP агентлиги хабарига кўра, намойишчилардан бирининг қўли полиция қўллаган тартибни сақлаш гранатаси портлаши оқибатида узилиб кетган.
Франция Савдо-саноат палатаси раҳбарининг маълум қилишича, мамлакатдаги 2 мингдан ортиқ дўкон ва бошқа корхона тартибсизликлардан бевосита зарар кўрган.
