Россия президенти Владимир Путин АҚШ президенти Дональд Трамп ва Хитой раҳбари Си Цзиньпинни Украинадаги урушни муҳокама қилиш учун уч томонлама учрашув ўтказишга таклиф қилди. Бу ҳақда The Wall Street Journal манбаларга таяниб хабар берди.
Маълум қилинишича, Кремль учрашувни 18–19 ноябрь кунлари Хитойнинг Шэньчжэнь шаҳрида бўлиб ўтадиган Осиё-Тинч океани иқтисодий ҳамкорлиги (APEC) саммити доирасида ташкил этишни таклиф қилган.
Россия президенти матбуот котиби Дмитрий Песков учрашув имконияти муҳокама қилинаётганини тасдиқлаган, аммо унинг санаси ҳозирча аниқ эмаслигини билдирган. АҚШ маъмуриятининг юқори мартабали вакили эса Трамп ҳозирча бундай учрашувга розилик бермаганини айтган.
Нашр манбасига кўра, Путин бу таклифни 9 октябрь куни Трамп билан телефон орқали суҳбатлашганида илгари сурган. Москва бу ғояни дипломатик каналлар орқали Пекинга ҳам етказган. Хитой томони Трамп ҳам рози бўлган тақдирда, учрашувга қарши эмаслигини билдирган.
Таҳлилчилар фикрича, уч томонлама саммит Си Цзиньпиннинг Хитойни халқаро дипломатияда муҳим воситачи сифатида намоён этиш ҳаракатларида аҳамиятли қадам бўлиши мумкин.
