Исроил бош вазири Биньямин Нетаньяху АҚШ билан олиб борилаётган музокараларда Эронга қарши кенг кўламли ҳарбий ҳаракатларни қайта бошлаш масаласини кўтармоқда. Бу ҳақда хорижий манбаларга таяниб Zamon.uz хабар берди.
Нашр маълумотларига кўра, Исроил ҳарбийлари октябрь ойи бошида Эронга қарши янги интенсив операция ўтказиш режасини ишлаб чиққан. Унга кўра, ҳужумлар 10 октябрда бошланиши ва бир неча кун давом этиши керак бўлган.
Режада электр станциялари каби фуқаролик инфратузилмаси объектлари, шунингдек, ядровий иншоотларни нишонга олиш кўзда тутилган.
Бироқ АҚШ президенти Дональд Трампнинг позицияси туфайли операцияни амалга ошириш режалари ортга сурилган. Манбаларга кўра, Трамп Исроил томонига Вашингтон АҚШ Конгрессига оралиқ сайловлар якунлангунига қадар кескин ҳаракатларни амалга оширишни истамаётганини билдирган.
The Financial Times манбалари ҳарбий операцияларни қайта бошлаш ҳақидаги баёнотлар Эронга ён бериш учун босим ўтказиш тактикаси бўлиши мумкинлигини ҳам истисно этмаган.
Аввалроқ Axios нашри ҳам ўз манбаларига таяниб, Трамп ва Нетаньяху АҚШ ҳамда Исроилдаги сайловлардан олдин Эронга қарши янги кенг кўламли ҳарбий операция ўтказиш имкониятини муҳокама қилгани ҳақида хабар берган эди.
АҚШда Конгрессга оралиқ сайловлар 3 ноябрь куни бўлиб ўтади. Унда Вакиллар палатасидаги барча ўринлар ҳамда Сенатдаги айрим ўринлар учун сайловлар ўтказилади.
