Билим ва малакаларни баҳолаш агентлиги томонидан ўтказиладиган имтиҳонларда тест материаллари амалдаги лотин ёзувига асосланган ўзбек алифбосида тайёрланади. Бу ҳақда агентлик маълум қилди.
Қайд этилишича, очиқ турдаги тест топшириқларига жавоблар ҳамда ёзма ишлар, жумладан, эсселар ҳам амалдаги алифбода ёзилиши лозим. Шу сабабли имтиҳон иштирокчилари жавобларини ёзишда ҳозирда қўлланилаётган алифбодан фойдаланиши керак.
Маълум қилинишича, янги алифбони жорий этиш тўғрисидаги қонунда унинг олти ойдан сўнг кучга кириши белгиланган. Шу муносабат билан агентлик томонидан ташкил этиладиган имтиҳонларда янги алифбога эмас, амалдаги алифбога таянилади.
Агентликнинг таъкидлашича, тест материаллари ва ёзма топшириқларни бажаришда амалдаги алифбодан фойдаланиш тартиби қонунчиликда белгиланган муддатлар билан боғлиқ.
