Албания пойтахти Тиранада талабалар намойишлари давом этаётган бир пайтда парламентда ҳукумат ва мухолифат депутатлари ўртасида низо келиб чиқди. Бу ҳақда 23 октябрь куни Euronews хабар берди.
Маълум қилинишича, можаро парламент раҳбарияти мухолифатнинг пойтахтда бир неча кундан бери давом этаётган талабалар намойишларини муҳокама қилиш талабини рад этганидан кейин бошланган. Мухолифат депутатлари полиция билан тўқнашувларда жабрланган талабаларнинг суратларини кўтариб, парламент минбарини тўсиб қўйган.
Шунга қарамай, депутатларнинг кўпчилиги қонун лойиҳалари бўйича овоз беришни давом эттирган. Бу вақтда парламент биноси олдида талабалар гуруҳлари тўпланган.
Тиранадаги намойишлар қарийб икки ҳафтадан бери давом этмоқда. Акциялар чоғида айрим намойишчилар ҳуқуқ-тартибот идоралари ходимларига тош, мушакбозлик воситалари, "Молотов коктейллари" ва петардалар отган. Полиция эса жавобан резина таёқлар, сув пуркагичлар ва кўздан ёш оқизувчи газдан фойдаланган.
Намойишчилар олий ўқув юртлари ва мактабларда таълим олаётган ёшлар номидан ўқиш тўловини камайтириш, таълим соҳасига давлат инвестицияларини ошириш ҳамда коррупцияга қарши чоралар кўришни талаб қилмоқда.
Кейинчалик намойишларга бош вазир Эди Раманинг истеъфосини талаб қилаётган кенгроқ ҳукуматга қарши ҳаракат иштирокчилари ҳам қўшилган.
Эди Рама истеъфога чиқиш ниятида эмаслигини билдирган. Унинг фикрича, намойишчиларнинг қонуний талабларидан атайлаб зўравонлик келтириб чиқаришга интилувчи кучлар фойдаланмоқда.
Талабалар намойишлари Адриатика денгизининг жанубий соҳилидаги йирик сайёҳлик мажмуаси қурилишига қарши бир неча ойдан бери ўтказилаётган «Фламинго» ҳаракати акцияларидан кейин бошланган. Лойиҳа АҚШ президенти Дональд Трампнинг куёви Жаред Кушнер асос солган инвестиция компанияси билан боғлиқ.
