Президент Шавкат Мирзиёев кино соҳаси вакилларини қўллаб-қувватлашга қаратилган бир қатор ташаббусларни илгари сурди. Жумладан, Қуйи Чирчиқ туманидаги “Кўҳинур” сиҳатгоҳи тўлиқ киноижодкорлар ихтиёрига берилади. Шунингдек, соҳада илм, таҳлил ва профессионал танқидчиликни ривожлантириш учун “Киношунослар клуби” ташкил этилади.
Давлат раҳбари таъкидлашича, замонавий талаблар асосида таъмирланиб, жиҳозланган “Кўҳинур” сиҳатгоҳи киночиларнинг дам олиши ва янги ғоялар устида ишлаши учун ижодий масканга айланиши керак. Бундан ташқари, ҳар йили кино соҳасида фаолият юритаётган камида 300 нафар ходимга республикадаги сиҳатгоҳларда бепул дам олиш ва даволаниш учун йўлланмалар берилади.
“Ўзбекфильм” миллий кинокомпанияси “Киношунослар клуби” фаолиятини қўллаб-қувватлайди ва унинг Халқаро кинотанқидчилар федерацияси — FIPRESCIга аъзо бўлишига кўмаклашади. Бу миллий фильмларнинг нуфузли халқаро фестиваллардаги иштирокини кенгайтиришга хизмат қилиши кутилмоқда.
Шу билан бирга, Ўзбекистон Кино арбоблари ва Ўзбекистон кино саноати вакиллари уюшмалари бирлаштирилиб, Ўзбекистон кино соҳаси вакиллари палатаси ташкил этилади. Ушбу тузилма ижодкорларнинг муаллифлик ҳуқуқлари ва касбий манфаатларини ҳимоя қилиш, соҳада ўзини ўзи бошқаришни ривожлантириш ҳамда ёшларнинг касбий ўсишига кўмаклашиш билан шуғулланади.
Янги палата фаолиятини ташкил этиш ишларини бир ой муддатда якунлаш, ёш киноижодкорларнинг хорижда малака ошириши ва палата фаолиятини молиявий-ташкилий жиҳатдан қўллаб-қувватлаш белгиланди.
