Президент Шавкат Мирзиёев миллий кино саноатини янги технологик босқичга олиб чиқиш, сунъий интеллект имкониятларидан кенг фойдаланиш ва “Ўзбекфильм” номини ягона миллий кино бренди сифатида мустаҳкамлаш ташаббусларини илгари сурди. Бу ҳақда давлат раҳбарининг киноижодкорлар билан учрашуви якунида маълум қилинди.
Кино яратишда сунъий интеллект имкониятларидан фойдаланиш бўйича ҳамкорлик дастури бир ой муддатда ишлаб чиқилади. Унда янги таълим дастурларини тайёрлаш, мутахассисларни ўқитиш ва уларнинг хорижда малакасини ошириш масалалари қамраб олинади.
Шунингдек, Тошкент шаҳридаги ҳозирги Чилонзор кўчасининг тегишли қисмига “Ўзбекфильм” номини бериш таклиф қилинди. Кино санъати музейини “Ўзбекфильм” музейи, Кино санъати саройини “Ўзбекфильм” кинокаройи, Миллий кинофондни эса “Ўзбекфильм” миллий кинофонди деб номлаш орқали уларни ягона бренд остида бирлаштириш режалаштирилмоқда.
Учрашув якунида Президент миллий кинони ривожлантиришнинг муҳим йўналишлари белгилаб олинганини ва тегишли ўзгаришларни назарда тутувчи фармон имзоланганини маълум қилди.
Давлат раҳбари киноижодкорларга мурожаат қилиб, миллий кинонинг янги саҳифасини яратиш учун уларга ишонишини таъкидлади. Унинг қайд этишича, яхши фильм яратиш учун шароит билан бирга ҳалол меҳнат, ватанпарварлик ва халққа муҳаббат ҳам зарур.
