Президент Шавкат Мирзиёев тиббиёт соҳасидаги муаммолар, хорижда фаолият юритаётган ўзбекистонлик шифокорларни Ватанга қайтариш ва улар учун муносиб шароит яратиш масалаларига тўхталди.
Давлат раҳбари тиббиёт соҳаси ҳали ҳам бюрократия ва коррупциядан тўлиқ халос бўла олмаган йўналишлардан бири эканини таъкидлади. Унинг айтишича, соҳа ривожи учун хорижда тажриба орттирган мутахассисларни Ўзбекистонга қайтариш, уларни қўллаб-қувватлаш ва зарур шароитларни яратиш муҳим.
«Энг оғир соҳамиз — тиббиёт. Энг оғир. Барибир ҳали бюрократия, коррупция йўқ бўлиши қийин бўлаётган соҳа — бу тиббиёт», — деди Президент.
Шавкат Мирзиёев хорижда ишлаётган ўзбекистонлик шифокорлар Ватанга қайтиши учун уларга кўмак бериш, меҳр кўрсатиш ва фидойилик билан ёндашиш кераклигини қайд этди. Унинг таъкидлашича, бундай мутахассисларнинг қайтиши тиббиётда янги йўналишлар пайдо бўлиши, ривожланиш ва ўзгаришларга туртки беради.
"Улар катализатор бўлади. Янги йўналиш бўлади, интилиш бўлади, ўзгариш бўлади ва одамлар рози бўлади. Энг катта нарса шу. Ва шунга муносиб шароит яратиш керак", — деди давлат раҳбари.
Суҳбат давомида Президент Ойбек исмли мутахассисдан Ўзбекистондаги маоши хориждаги иш ҳақи билан таққослаганда қандай эканини сўради.
"Ойбек, зарплата-то соответствует тем стандартам, которые получают за границей или нет?" — деб сўради Шавкат Мирзиёев.
"Ну, я получаю больше, чем в Германии сейчас здесь, и приблизительно так же, как в Москве", — деб жавоб берди мутахассис.
"Ну вот… Ну то есть соответствует", — деди Президент.
Шундан сўнг давлат раҳбари Ўзбекистонда ишлаш имкониятлари ҳақида сўради. Ойбек мамлакатда фаолият юритиш мумкинлигини, Президент томонидан мутахассисларнинг қайтиб келиб ишлаши учун шароит яратилаётганини таъкидлади.
Учрашувда иштирок этган яна бир мутахассис эса Президентнинг нутқидан сўнг Ватанга қайтиш истаги кучайганини билдирди.
"Ассалому алайкум, ҳурматли Президент! Ҳозирги сиз айтган нутқларни эшитиб, мен “точно қайтаман”, деган умиддаман. Яъни маблағ эмас, айтилган маблағлар эмас, молиявий тараф эмас, сизнинг ичингиздаги ўтни кўриб, менинг ҳам қайтгим келди", — деди у.
Таъкидлаш жоизки, тиббиёт соҳасида малакали кадрларни сақлаб қолиш ва хорижда ишлаётган мутахассисларни Ватанга қайтариш учун муносиб меҳнат шароити, адолатли иш ҳақи ва касбий ривожланиш имкониятлари муҳим аҳамиятга эга.
