АсосийЖАМИЯТ
Муаллиф: Darakchi.uz

Жиззахда 550 МВт қувватли янги иссиқлик электр станцияси ишга тушди

Станция йилига 4,4 миллиард кВт·соат электр энергияси ишлаб чиқариш ва 500 миллион куб метр табиий газни тежаш имкониятига эга.

'Жиззахда 550 МВт қувватли янги иссиқлик электр станцияси ишга тушди'ning rasmi

Жиззах вилоятининг Шароф Рашидов туманида қурилган 550 МВт қувватли янги иссиқлик электр станцияси Ўзбекистон ягона энергетика тизимига уланди ва электр энергияси ишлаб чиқаришни бошлади. Бу ҳақда Энергетика вазирлиги хабар берди.

Маълум қилинишича, янги станция йилига 4,4 миллиард кВт·соат электр энергияси ишлаб чиқариш қувватига эга. Бу ҳажм ўртача 1,8 миллион хонадоннинг бир йиллик электр энергияси истеъмолини қоплашга етади.

Шунингдек, станция йилига 500 миллион куб метр табиий газни тежаш имконини беради. Бу эса мамлакат энергетика тизимида мавжуд ресурслардан самарали фойдаланишга хизмат қилиши кутилмоқда.

Янги қувватларнинг ишга туширилиши аҳоли ва саноат корхоналарини электр энергияси билан барқарор таъминлаш, шунингдек, иқтисодиёт тармоқларининг узлуксиз фаолиятини қўллаб-қувватлашга қаратилган.

Қайд этилишича, мазкур станция Жиззах вилоятидаги биринчи йирик иссиқлик электр станцияси ҳисобланади. Шу пайтгача ҳудудда битта кичик гидроэлектр станцияси ва иккита йирик қуёш электр станцияси мавжуд бўлган.

Янги станциянинг тармоққа уланиши вилоят энергетика тизимида ишлаб чиқариш қувватларини оширишда муҳим аҳамият касб этади.

    Бошқа янгиликлар