"Microsoft" таҳлилларига кўра, 2026 йилнинг биринчи чорагида Бирлашган Араб Амирликлари ва Сингапур сунъий интеллектдан фойдаланиш бўйича дунёда етакчи давлатларга айланган.
Тадқиқотда ойига камида 90 дақиқа SI воситаларидан фойдаланадиган меҳнатга лаёқатли аҳоли улуши ҳисобга олинган. Ҳозирда дунё бўйича катта ёшли аҳолининг 17,8 фоизи сунъий интеллектдан мунтазам фойдаланади.
Рейтингда БAA 70 фоиздан юқори кўрсаткич билан катта фарқда биринчи ўринни эгаллаган. Сингапур эса 63 фоиз билан иккинчи бўлган. Шу билан бирга, сунъий интеллект соҳасидаги энг йирик компаниялар ватани ҳисобланган АҚШ фойдаланиш даражаси бўйича ҳатто энг юқори 20 таликка ҳам кира олмаган.
Таҳлилчиларга кўра, бунга асосий сабаблардан бири — мамлакатлар иқтисодиёти ва ишчи кучи ҳажмидаги фарқдир. Кичик ва марказлашган тизимга эга давлатларда SI технологияларини жорий қилиш анча тез кечади. Йирик иқтисодиётларда эса бу жараён мураккаброқ ҳисобланади.
Европа давлатлари ҳам сунъий интеллектдан фойдаланиш бўйича юқори кўрсаткичларни намоён қилмоқда. Жумладан, Норвегия, Ирландия, Франция, Испания ва Нидерландияда SI’дан фойдаланиш даражаси 40 фоиздан ошган.
Осиёда эса энг тез ўсиш Жанубий Кореяда кузатилган — мамлакатда SI’дан фойдаланиш 43,2 фоизга ошган. Шунингдек, Таиланд, Япония ва Мўғулистонда ҳам юқори ўсиш суръатлари қайд этилган.
Хитойда ҳозирча сунъий интеллектдан фойдаланиш даражаси 16 фоиз атрофида бўлса-да, аҳоли сони катталиги сабаб ҳатто кичик ўсиш ҳам юз миллионлаб янги фойдаланувчиларни англатиши мумкин.
