Европа Иттифоқи турк ҳарбийларининг Сурия шимоли-шарқига жойлаштирилишига нисбатан ўз жавоб чораларини қўлламоқчи, деб хабар берди Euronews.com нашри.
Люксембургдаги учрашувда ЕИ ташқи ишлар вазирлари Туркияга қарши турли кўринишдаги санкцияларни қўллаш масаласини муҳокама этишди. Иттифоқнинг ташқи сиёсий масалалар бўйича олий комиссари бу каби чораларни қўллаш маълум вақт талаб этишини таъкидлади. Айрим вазирлар эса Туркия билан мудофаа ва хавфсизлик йўналишларидаги ҳамкорликни қисқартириш лозимлигини таъкидлашмоқда.
“Туркия ҳарбий операциясини тўхтатиш жуда қийин, қолаверса, бу билан Европа Иттифоқи шуғулланмайди. Бироқ биз қурол етказиб беришга тақиқ қўйишимиз мумкин”, дея таъкидлади Австрия ташқи ишлар вазири Александр Шалленберг. Нидерландия ташқи ишлар вазири Стеф Блок эса Туркияни қўшни давлат ҳудудига бостириб кириб, халқаро ҳуқуқ нормаларини бузаётганликда айблади.
