14 ноябрь куни ўзбекистонлик зиёратчиларнинг дастлабки гуруҳи эзгу ниятлар ила эҳтиромлар оғушида умра ибодатини адо этиш учун Саудия Арабистонига жўнаб кетдилар. “Умра – 2019/20” мавсуми бошлангани ҳақида Ўзбекистон мусулмонлари идораси Матбуот хизмати хабар берди.
Зиёратчилар ўн кунлик умра сафари давомида Мадина шаҳрида 3 кун, Макка шаҳрида 7 кун бўладилар. Улар мазкур шаҳарларда барча зарур шароитларга эга меҳмонхоналарда истиқомат қиладилар ҳамда уларга тажрибали ишчи гуруҳи, элликбошилар ва малакали шифокорлар хизмат кўрсатади.
Тайёргарлик доирасида барча зиёратчилар мавсумий касалликларга қарши эмланиб, давлатимиз рамзи туширилган камзул ва сумкалар билан таъминланди. Сафар олдидан уларга умра сафарининг моҳияти, уни адо этишга доир масалалар гуруҳ раҳбарлари томонидан тушунтирилди.
Саудия Арабистонида виза бериш тизимида янги тизимнинг жорий этилиши баъзи кечикишларга сабаб бўлди. Шунга қарамасдан, олиб борилган саъй-ҳаракатлар натижасида, 2019 йилнинг 14 ноябрь кунидан бошлаб ҳар куни “Тошкент–Жидда–Тошкент” йўналишида умра сафари йўлга қўйилди. Ушбу мавсум 2020 йилнинг ёз ойларига қадар давом этади.
Маълумот ўрнида, бугунги кунда Умра зиёратлари йил давомида квотасиз амалга оширилиши белгиланиб, 2019 йилнинг 1 апрелидан эътиборан ҳафтасига 7 та рейсда Умра сафарига фуқароларимизни юбориш бошланган. Ушбу муддат ичида 28 мингга яқин юртдошларимиз Умра сафарида бўлиб қайтдилар.
Аввалроқ Дин ишлари бўйича Қўмита Умра мавсуми бўйича махсус баёнот билан чиққанлиги ҳақида хабар бергандик.
