Ҳозирги пандемия вазиятида тўқимачилик маҳсулотлари экспорти кескин қисқармоқда. Транспорт харажатлари ҳам кескин ошган, маҳсулот таннархини пасайтириш имкони йўқ. Харидорлар эса нархни пасайтиришни сўрашмоқда. Бу вазиятда давлат томонидан тўқимачилик корхоналарини қўллаб-қувватлаш учун қандай чоралар кўрилмоқда?
Ушбу саволга «Ўзтўқимачиликсаноат» уюшмаси раиси Илҳом Ҳайдаров қуйидагича жавоб берди:
Президентимиз фармони доирасида ҳукумат томонидан Инқирозга қарши чоралар белгиланган бўлиб, Уюшмада тўқимачилик корхоналарига экспорт масалаларида кўмаклашиш бўйича тезкор Штаб ташкил этилган.
Корхоналар фаолияти билан боғлиқ муаммоларни тезкор ҳал этиш, жумладан: узлуксиз электроэнергия, хомашё, айланма маблағлар ва ишчилар билан таъминлаш билан боғлиқ барча масалалар бўйича тезкор чоралар кўрилмоқда, айрим тўловларни кечиктириш механизмлари жорий этилмоқда. Мисол учун, ойига 1 млн. доллардан кўп экспорт қиливчи 37 та корхона доимий мониторингга олинган.
Давлат солиқ қўмитасига алоҳида миннатдорлик билдирмоқчиман, охирги 3 кунда экспортдан вужудга келган ортиқча тўланган ҚҚСни қайтарилиши натижасида 50 млрд. сўмдан ортиқ маблағлар корхоналар ҳисоб рақамларига қайтарилди.
Жорий йил 1-чорагида 456 млн долларлик тўқимачилик ва тикув-трикотаж маҳсулотлари экспорти амалга оширилиб, ўтган йилнинг мос даврига нисбатан 126 % га ошди.
