Тадбиркорларга қуруқ картошка пюресини экспорт қилишга рухсат берилди. Бу ҳақда Ҳуқуқий ахборот канали маълум қилди.
Хабарда қайд этилишича “Тошкент вилоятида замонавий картошкачилик кластерини ташкил этиш чора-тадбирлари тўғрисида”ги Ҳукумат қарори (193-сон, 01.04.2020 й.) қабул қилинди.
Қарорга мувофиқ, Тошкент вилояти ҳудудида “Bo'stonliq kartoshkachilik markazi” МЧЖ, “Solanuz” МЧЖ, “Agrover-urug'chilik” МЧЖ, “Vernatural” МЧЖ ва "Sof tabiat agro" МЧЖ негизида истеъмолга йўналтирилган картошка ишлаб чиқариш ва уни чуқур қайта ишлаш бўйича агросаноат кластери ташкил этилади.
Қарор билан агрокластер фаолиятининг асосий йўналишлари белгиланди.
Жумладан, агрокластер уруғлик картошка етиштиради, уни вируссиз in vitro технологияси асосида кўпайтиради.
Уруғлик картошкани сертификатлаш бўйича тарифлар барча жисмоний ва юридик шахсларга ҳар бир тоннаси учун БҲМнинг 2 фоизи (4460 сўм)ни ташкил этади.
Қарор билан тадбиркорлик субъектлари томонидан республикада ишлаб чиқарилган қуруқ картошка пюреси (ТИФ ТН коди 1105200000) экспортини амалга оширишга рухсат берилди.
