Апрел ойидан якка тартибдаги хайрия ишлари тўхтатилиши ва хайрия ишлари бўйича ягона марказ ташкил этилиши ҳақида аввал хабар берган эдик. Пойтахтимиздаги “Ўзэкспомарказ”да ана шу янги ташкил этилган Ягона мувофиқлаштирувчи марказ ўз фаолиятини бошлади. Бу ҳақда Тошкент шаҳри ҳокимлиги матбуот хизмати хабар берди.
Бугун шаҳримиздаги 514 та маҳаллалар томонидан кам таъминланган оилалар, ёлғиз кексалар бўйича берилган рўйхат асосида 100га яқин кўнгиллилар 1996 нафар ҳамшаҳарларимизга кундалик энг зарур бўлган озиқ-овқат (товуқ гўшти, ун, гуруч, картошка, пиёз, шакар, ёғ, макарон) маҳсулотларини етказиб бердилар.
Озиқ-овқат, кийим-кечак, дори-дармон маҳсулотларига эҳтиёж сезиб, уларни харид қилишга қийналаётган ёлғиз кексалар ва кам таъминланган оилалар марказга 1197 телефон рақами орқали қўнғироқ қилиб, ўз мурожаатларини маълум қилишлари мумкин.
Марказ ҳукумат, ҳокимлик ва ҳомийлар маблағлари ҳамда кўмаги асосида келиб тушган мурожаатларни қаноатлантириб боради.
