Жорий йилнинг 31 март куни ишга туширилган “Сoronavirusyordam” онлайн телеграм ботига бугун, 11 апрель соат 15:00 гача 83 мингдан ортиқ фуқаро кирган. Улардан 10 мингдан ортиғи операторлар билан чат орқали боғланган ва 18 мингдан ортиқ саволларга жавоб олишган. Қолганлар эса ботдаги тайёр савол-жавоблардан ўзларига керакли маълумотларни олишган. Бу ҳақда Соғлиқни сақлаш вазирлиги Жамоатчилик билан алоқалар бўлими маълум қилди.
Ушбу телеграм ботни юритиш буйича ишчи гуруҳ раҳбари, тиббиёт фанлари доктори, профессор Шуҳрат Боймурадовнинг айтишича, бугунги кунда энг кўп бериладиган саволлар қуйидагича: вилоятлар ёки туманлар кесимида касалланганлик ҳолати қандай, коронавирус инфекциясига учраган инсонда касалликнинг белгилари қанақа бўлади, COVID-19 тасдиқланган ҳолатлар карантиндагилар ичидан аниқланаяптими ёки аҳоли орасидан, беморларнинг ҳозирги аҳволи қанақа ва ҳоказолар.
Қайд этилишича, фуқаролар ҳаммасидан ҳам кўпроқ “Карантин качон тугайди?” деган саволни бермоқда.
70 га яқин тажрибали шифокор, профессор ва ўқитувчилардан иборат операторлар гуруҳи барча саволларга уч сменада туну кун онлайн тартибида жавоб бермоқда.
Аҳоли томонидан кўп берилаётган саволлар тўплами ва уларга малакали мутахассислар томонидан тайёрланган жавоблар қулай шаклда ботга ҳам жойлаштирилган.
